امریکا میں ہونے والی ایک حالیہ تحقیق کے مطابق کورونا کی تین بڑی ویکسین اومیکرون ویرینٹ کے خلاف واضح طور پر کم موثر ثابت ہوئی ہیں۔

عالمی خبررساں ایجنسی رائٹرز کے مطابق یہ تحقیق میسا چیوسٹس جنرل اسپتال، ایم آئی ٹی اور ہارورڈ کے ریسرچرز کی جانب سے مشترکہ طور پر کی گئی، ریسرچ میں ایسے لوگوں کے خون کے نمونے لیے گئے جنہوں نے موڈرنا، جونسن اینڈ جونسن یا فائزر ویکسین کی تمام خوراکیں لگوائی ہوئی تھی۔

ان افراد کے خون کو مصنوعی طور پر تیار کیے گئے اومیکرون سے مشابہ وائرس پر ٹیسٹ کیا گیا تو یہ ویکسین اس کے خلاف قوت مدافعت پیدا کرنے میں بہت کم موثر ثابت ہوئیں۔

ریسرچرز کے مطابق ان تینوں ویکسین کی اومیکرون کے خلاف پیدا ہونے والی انٹی باڈیز یا تو مکمل طور پر ناپید نکلیں یا پھر بہت کم قوت مدافعت پیدا کر سکیں۔

ریسرچرز نے اگلے مرحلے میں ان افراد کو ٹیسٹ کیا جنہوں نے کورونا کے خلاف اضافی ویکسین (بوسٹر شاٹ) لگوائی ہوئی تھی، اس تجربے سے یہ بات سامنے آئی کہ ان افراد میں مناسب مقدار میں انٹی باڈیز پیدا ہو گئی تھیں۔

یہ بات یاد رہے کہ ابھی تک اس تحقیق کو دیگر سائنسدانوں نے ریویو نہیں کیا۔

ڈیلٹا ویرینٹ کے مقابلے میں اومیکرون دگنا رفتار سے پھیلتا ہے

سائنسدانوں کی ریسرچ سے یہ بات بھی سامنے آئی کہ اومیکرون وائرس ڈیلٹا ویرینٹ کے مقابلے میں دگنی رفتار سے پھیلتا ہے۔

واضح رہے کہ اس وقت پوری دنیا میں اور بالخصوص یورپ میں ڈیلٹا وائرس نے بہت تباہی پھیلائی ہوئی ہے، سائنسدانوں کا کہنا ہے کہ پھیلاؤ کے لحاظ سے اومیکرون بہت جلد ڈیلٹا کو پیچھے چھوڑ جائے گا جو کہ دنیا کے لیے ایک خطرے کی گھنٹی ہے۔

اومیکرون کے متعلق دیگر تحقیقات کے نتائج

حال ہی میں سامنے آنے والی دیگر تحقیقات کے نتائج بھی اس سے ملتے جلتے ہیں، آکسفورڈ یونیورسٹی کے ریسرچرز نے پیر کو اپنی ریسرچ کے نتائج پیش کیے ہیں جن کے مطابق فائزر اور اسٹرازینکا ویکسین کی دو خوراکیں اومیکرون ویرینٹ کے خلاف مناسب مقدار میں انٹی باڈیز پیدا نہیں کر سکیں۔

بائی این ٹیک اور فائزر نے حال ہی میں بتایا ہے کہ لیبارٹری ٹیسٹ کے مطابق تین خوراکوں کا کورس ہی اومیکرون کے خلاف موثر ثابت ہو سکا ہے، صرف دو خوراکیں لینے سے مطلوبہ مقدار میں قوت مدافعت پیدا نہیں ہوئی۔

فی الحال موڈرنا اور جانسن اینڈ جانسن نے اپنی تحقیقات کے نتائج پیش نہیں کیے، جانسن اینڈ جانسن سے جب رابطہ کیا گیا تو انہوں نے اس موضوع پر بات کرنے سے گریز کیا۔