شہباز شریف نے ایف آئی اے چالان کو جھوٹ کا پلندہ قرار دے دیا۔

مسلم لیگ ن کے صدر اور قومی اسمبلی میں اپوزیشن لیڈر شہباز شریف نے اپنے  اور اہل خانہ کے خلاف ایف آئی اے چالان کے معاملے پر بات کرتے ہوئے کہا کہ ایف آ ئی اے کی جانب سے جمع کروائے گئے الزامات مضحکہ خیز پروپیگنڈہ سے زیارہ کچھ نہیں۔

انہوں نے کہاکہ شہزاد اکبر اور حکومت جتنے مرضی جعلی جھوٹ اکٹھے کر لیں فتح انصاف کی ہو گی ، یقین ہے کہ عدالتوں سے انصاف ملے گا۔

شہباز شریف کے خلاف ایف آئی اے چالان

ذرائع کے مطابق ایف آئی اے نے اپنے چالان میں شہباز شریف اور حمزہ شہباز کو مرکزی ملزم نامزد کیا ہے۔

ایف آئی اے نے مسلم لیگ ن کے صدر شہباز، حمزہ شہباز اور دیگر کے خلاف 16 ارب منی لانڈرنگ کا چالان عدالت میں جمع کرا دیا ہے۔

ایف آئی اے نے چالان بینکنگ جرائم کورٹ میں جمع کرایا جس میں شہباز شریف اور حمزہ شہباز کو مرکزی ملزم نامزد کیا گیا ہے۔

ایف آئی اے کا چالان سات والیمز پر مشتمل ہے، جس میں 100 گواہوں کی لسٹ بھی جمع کرا دی ہے۔

یہ گواہ شہباز شریف اور حمزہ شہباز کے خلاف عدالت میں گواہی دیں گے۔

یہ بھی پڑھیں:

شہباز شریف کا کہنا ہےکہ پاکستان کی تاریخ میں اتنی قیامت خیز مہنگائی نہیں آئی جتنی اس وقت ہے۔

پاکستان مسلم لیگ ن کے صدر اور قومی اسمبلی میں اپوزیشن لیڈر شہباز شریف نے احتساب عدالت کے باہرمیڈیا سے گفتگو کرتے ہوئے کہاکہ اس مہنگائی نے ہر گھر کو تباہ حال کر دیا ہے،  لوگ اس وقت ہاتھ اٹھا کر بد دعائیں دے رہے ہیں۔

انہوں نے کہاکہ اس حکومت نے لوگوں کا جینا حرام کر دیا ہے، لوگ ایک وقت کی روٹی کو ترس رہے ہیں، ادویات، بچوں کے دودھ کی قیمتیں آسمان سے باتیں کر رہی ہیں، پوری قوم اس وقت ایسی صورتحال میں ہے جس سے خوف آتا ہے۔

اس موقع پر صحافی نے مسلم لیگ ن کے صدرشہباز شریف سے سوال کیاکہ ایف آئی اے نے چالان پیش نہیں کیا؟

انہوں نے جواب دیا کہ ان کی بدنیتی سب سامنے آگئی ہے۔

واضح رہےکہ احتساب عدالت میں آشیانہ اقبال ہاؤسنگ اور رمضان شوگرملز ریفرنسز پر سماعت ہوئی۔

عدالت نے مسلم لیگ ن کے نائب صدر حمزہ شہباز کی ایک روزہ حاضری معافی کی درخواست منظور کر لی جبکہ  شہباز شریف کو بھی حاضری لگا کر جانے کی اجازت دے دی۔

عدالت نے کیس کی سماعت رواں ماہ 20 دسمبر تک ملتوی کر دی۔