دنیا بھر کی طرح بھارت میں بھی کورونا کیسز کی تعداد بڑھ رہی ہے صرف ممبئی میں گزشتہ 6 ماہ کے یومیہ سب سے زیادہ کیسز رپورٹ ہوئے ہیں۔

بھارت کے اہم ترین شہر ممبئی میں کورونا بالعموم اور بالخصوص اس کا اومیکرون ویرینٹ بہت تیزی سے پھیل رہا ہے۔

گزشتہ روز شہر میں کوویڈ 19 کے 922 کیسز سامنے آئے ہیں جو کہ رواں برس 4 جون کے بعد ایک روز میں سب سے زیادہ ہیں۔

رواں برس 4 جون کو 955 کیسز سامنے آئے تھے۔

متعلقہ خبر: اومیکرون کے باعث بھارتی ریاست مہارشٹرا میں رات کا کرفیو نافذ

سرکاری اعداد و شمار کے مطابق گزشتہ روز ممبئی میں 34 ہزار سے زائد ٹیسٹس کئے گئے، جن میں کوویڈ 19 پازیٹیو کیسز کی شرح 2.67 فیصد رہی۔

ممبئی کی انتظامیہ کا کہنا ہے کہ یہ مسلسل چھٹا دن ہے جب شہر میں کورونا مثبت کیسز کی تعداد بڑھ رہی ہے۔

ممبئی میں ایک ہفتے کے دوران کوویڈ کے فعال کیسز دگنے ہوگئے ہیں، 19 دسمبر کو شہر میں 2 ہزار 81 فعال کیسز تھے جو کہ 27 دسمبر کو 4 ہزار 295 ہوگئے ہیں۔

ممبئی کی بدلیاتی انتظامیہ کا کہنا ہے کہ شہر میں کورونا کیسز کی تعداد بڑھ رہی ہے، اس حوالے سے ٹیسٹنگ کی تعداد میں اضافہ کیا گیا ہے، بین الاقوامی مسافروں اور ان کے عزیزی و اقارب کے بھی ٹیسٹ کئے جارہے ہیں۔

متعلقہ خبر: اومیکرون میں اضافے کے سبب نئی دلی میں کرفیو نافذ

واضح رہے کہ اومیکرون کے پھیلاؤ کو مد نظر رکھتے ہوئے بھارت کی کئی رایستوں میں رات کا کرفیو نافذ کردیا گیا ہے۔