بلاول بھٹو زرداری نے کہا ہے کہ آغا سراج درانی کو پیپلزپارٹی کا سچا جمہوری کارکن ہونے کی سزا دی جارہی ہے۔

 اپنے ایک بیان میں  پاکستان پیپلزپارٹی کے چیئرمین بلاول بھٹو زرداری نے نیب کے ہاتھوں اسپیکر سندھ اسمبلی آغا سراج درانی کی گرفتاری پر مذمت کی  ہے۔

انہوں نے کہا کہ آغا سراج درانی کو پاکستان پیپلزپارٹی کا ایک سچا جمہوری کارکن ہونے کی سزا دی جارہی ہے، نیب کی مداخلت کی وجہ سے آج نہ صرف ملکی اقتصادی سرگرمیاں ماند پڑچکی ہیں بلکہ انتظامی ادارے بھی اپنا بھرپور فعال کردار کو ادا نہیں کرپارہے۔

بلاول بھٹو زرداری کا کہنا تھا کہ نیب پی ٹی آئی کی آلہ کار بن کر اپوزیشن کے خلاف کارروائیاں کررہی ہے، ہم یہ ظلم برداشت نہیں کریں گے۔

 پاکستان پیپلزپارٹی کے چیئرمین بلاول بھٹو زرداری کا مزید کہنا تھا کہ احتساب ایک جمہوری عمل ہے تاہم احتساب کی آڑ میں انتقامی کارروائیاں جمہوریت کے لئے تباہ کن ثابت ہوں گی۔

اس سے قبل قومی احتساب بیورو (نیب) نے اسپیکر سندھ اسمبلی آغا سراج درانی کو سپریم کورٹ  کے باہر سے گرفتار کرلیا۔

آغا سراج درانی اپنے وکیل کے ہمراہ سپریم کورٹ میں ضمانت کی درخواست کے حوالے سے پیش ہوئے تھے لیکن عدالت نے ان کی ضمانت کی درخواست مسترد کردی تھی۔

سپریم کورٹ کی جانب سے درخواست مسترد ہونے پر اسپیکر سندھ اسمبلی آغا سراج درانی کافی دیر تک سپریم کورٹ کے اندر ہی موجود رہے۔ نیب راولپنڈی کی ٹیم سپریم کورٹ کے باہر ان کا انتظار کرتی رہی اور جیسے ہی وہ باہر آئے انہیں گرفتار کرلیا گیا۔

ذرائع کا کہنا ہے کہ نیب آغا سراج درانی کا طبعی معائنہ کروائے گی جب کہ سندھ منتقلی کے لیے راہداری ریمارنڈ ملنے تک آغا سراج درانی کو نیب راولپنڈی کی تحویل میں رکھا جا ئے گا۔

کیس کا پس منظر

قومی احتساب بیورو (نیب) کی جانب سے اسپیکر سندھ اسمبلی پر الزام عائد کیا گیا ہے کہ انہوں نے غیر قانونی آمدن سے اپنے بچوں کے نام پراپرٹی خریدی ہے جس پر آغا سراج درانی نے اپنی درخواست ضمانت کے لیے عدالت سے رجوع کیا۔

سندھ ہائی کورٹ نے اسپیکر سندھ اسمبلی سمیت 11 ملزمان کی درخواستِ ضمانت مسترد کر دی  جب کہ نیب ٹیم نے آغا سراج درانی کی گرفتاری کے لیے چھاپے بھی مارے لیکن روپوش ہو گئے تھے۔