میاں اسلم اقبال نے کہا کہ ن لیگ اور پیپلزپارٹی کی کرپشن کی کہانیاں آج بھی زبان زد عام ہیں۔

صوبائی وزیر صنعت وتجارت میاں اسلم اقبال سے اپنے کیمپ آفس میں یونین کونسل 97کے نمائندوں اور لوگوں کی ملاقات ہوئی جس میں علاقے میں جاری ترقیاتی اسکیموں اور شہریوں کو درپیش مسائل پر بات چیت کی گئی۔

صوبائی وزیر میاں اسلم اقبال نے اپنے کیمپ آفس میں یونین کونسل 97کے رہائشیوں سے خطاب کرتے ہوئے کہا کہ پاکستان تحریک انصاف کی سیاست کا محور عوام کی خدمت ہے۔

انہوں نے کہا کہ خدمت خلق سے بڑھ کر کوئی چیز اہم نہیں، اپنا ہر لمحہ عوام کی خدمت کے لئے وقف کر رکھا ہے۔

اسلم اقبال نے کہا کہ سابق حکمرانوں نے اقتدار کو عوامی خدمت کی بجائے لوٹ مار کا ذریعہ بنائے رکھا، ن لیگ اور پیپلزپارٹی کی کرپشن کی کہانیاں آج بھی زبان زد عام ہیں۔

صوبائی وزیر کا کہنا ہے کہ کرپشن کے وائرس نے معیشت اور ملک کی بنیادوں کو ہلا کر رکھ دیا تھا، کرپٹ ٹولے کی دولت بڑھتی رہی اور غریب بنیادی سہولتوں کو ترستے رہے، سابق حکمرانوں نے ترقی کے نام پر غریبوں کے حقوق چھینے ہیں۔

اسلم اقبال نے کہا کہ پاکستان تحریک انصاف قومی وسائل ترقیاتی منصوبوں پر صرف کرکے عوام کا حق لوٹا رہی ہے، معاشی مشکلات کے باوجود عوام کے مفادات کا تحفظ یقینی بنارہے ہیں۔

انہوں نے مزید کہا کہ مسائل سے آگاہی کے لئے عوام میں موجود ہوں، لوگوں کے مسائل اپنے مسائل سمجھ کر حل کرنے کی کوشش کرتا ہوں اور  لوگوں کی شکایات کے ازالے تک چین سے نہیں بیٹھوں گا۔