پاکستان سمیت دنیا بھر میں مسیحی برادری حضرت عیسیٰ علیہ السلام کی ولادت کی مناسبت سے کرسمس کا تہوار منا رہی ہے۔

دنیا بھر کی طرح پاکستان میں بھی کرسمس کے تہوار کا باقاعدہ گزشتہ رات گرجا گھروں میں منعقدہ خصوصی دعائیہ تقریبات سے ہوا۔ صبح ہوتے ہی مسیحی برادری اپنے پیاروں، عزیزوں اور اقارب کو مبارک باد دے رہے ہیں اور روایتی انداز میں تحفے تحائف کا تبادلہ کیا جارہا ہے۔

مسیحی برادری نے اپنے گھروں ، محلوں اور عبادتگاہوں کو خصوصی برقی قمقموں ، کرسمس ٹریز اور ڈیوڈ اسٹارز سے سجا رکھا ہے۔

دوسری جانب ملک میں دہشت گردی کے خدشات کے پیش نظر سیکیورٹی بھی ہائی الرٹ کی گئی ہے۔

صدر مملکت کی مبارکباد

صدر مملکت ڈاکٹر عارف علوی نے کرسمس کے موقع پر پاکستان اور دنیا بھر میں مسیحی برادری کو دلی مبارکباد پیش کرتے ہوئے کہا ہے کہ بحیثیت مسلمان ہم حضرت عیسٰی علیہ السلام کا خصوصی احترام کرتے ہیں

صدر مملکت نے کہا کہ حضرت عیسیٰؑ نے نہ صرف بیمار انسانیت کو شفا بخشی بلکہ رواداری، محبت اور ہمدردی کی اعلیٰ اقدار کی بھی تبلیغ کی۔

ڈاکٹر عارف علوی نے کہا کہ حضرت عیسیٰ علیہ السلام کو اس دنیا میں امن، بھائی چارے اور انسانیت کے احترام کی علامت کے طور پر بھیجا گیا۔

صدر مملکت نے کہا کہ حکومت اقلیتوں سمیت تمام پاکستانیوں کو مساوی مواقع فراہم کرنے کے لیے پرعزم ہے۔

وزیر اعظم کی مسیحی بھائیوں کو مبارک

وزیر اعظم عمران خان نے اپنی ٹوئٹ میں مسیحی برادری کو کرسمس کی مبارک باد دی ہے۔

Wishing all our Christian citizens a very Happy Christmas.

— Imran Khan (@ImranKhanPTI) December 25, 2021

کرسمس کی خوشیاں مبارک ، شیخ رشید

اپنی ٹوئٹ میں وزیر داخلہ شیخ رشید نے کہا کہ دنیا بھر بالخصوص پاکستان میں بسنے والے تمام مسیحیوں کو کرسمس کی خوشیاں مبارک ہوں، دعاگو ہوں اللہ تعالی آج کرسمس کے موقع پرتمام انسانوں پر اپنی خصوصی رحمت نازل کرے۔

دنیا بھر بلخصوص پاکستان میں بسنے والے تمام مسیحیوں کو کرسمس کی خوشیاں مبارک ہوں۔

دعاگو ہوں اللہ تعالی آج کرسمس کے موقع پرتمام انسانوں پر اپنی خصوصی رحمت نازل کرے۔

— Sheikh Rashid Ahmed (@ShkhRasheed) December 25, 2021

بلاول بھٹو زرداری کی مبارکباد

پاکستان پیپلز پارٹی کے چیئرمین بلاول بھٹو زرداری نے اپنے پیغام میں کہا ہے پیپلز پارٹی نے مسیحیوں سمیت تمام غیر مسلموں کو ہمیشہ برابر کا شہری تسلیم کیا ہے۔

بلاول بھٹو زرداری نے کہا کہ بینظیر بھٹو اور آصف علی زرداری کی حکومتوں نے سینیٹ سمیت تمام ایوانوں میں غیر مسلموں کی نمائندگی کو یقینی بنایا۔