کورونا وبا کے دو برس بعد بھی دنیا اس وائرس سے نجات حاصل کرنے میں ناکام رہی ہے کیونکہ یہ وائرس تیزی سے اپنی جنیاتی شکل تبدیل کر رہا ہے اس ضمن میں احتیا طی تدابیرکے ساتھ ویکسین ہی وہ واحد راستہ جو اس وائرس سے تحفظ میں مددگار ثابت ہوسکتا ہے۔

چھوٹے بچوں کو وائرس سے بچانے میں والدین کی ویکسینیشن بہت مددگار ثابت ہوسکتی ہیں یہ بات ایک نئی طبی تحقیق کےنتیجے میں سامنے آئی ہیں۔

جرنل سائنس میں شائع تحقیقی رپورٹس کے مطابق والدین کی ویکسینیشن ایسے بچوں میں جو ویکسین سے محروم ہوں کورونا وائرس سے متاثر ہونے کا خطرہ کم کر دیتی ہے۔

واضح رہے کہ یہ تحقیق اسرائیل میں کی گئی اس تحقیق کے پہلے مرحلے میں جنوری سے مارچ 2021 کے دوران ڈیٹا کا جائزہ لیا گیا جب وہاں کورونا کی قسم ایلفا پھیل رہی تھی جبکہ دوسرے مرحلے میں جولائی سے ستمبر 2021 کے ڈیٹا کو نوٹ کیا گیا جب ڈیلٹا قسم تیزی سے پھیل رہی تھی۔

جنوری سے مارچ کے دوران اسرائیل میں کسی بھی عمر کے بچوں کو ویکسین کے لئے اہل قرار نہیں دیا گیا تھا جبکہ دوسرے مرحلے میں وہاں 12 سال یا اس سے زائد عمر کے بچوں کو ویکسین کی ڈوز لگائی جارہی تھی۔

اس طرح محققین نے دریافت کیا کہ ایسے بچے جو کسی ایسے گھر میں رہ رہے ہیں جن کے والدین میں سے کسی ایک کی بھی ویکسینیشن ہوچکی ہے تو ان بچوں میں کووڈ سے متاثر ہونے کا خطرہ 26 فیصد کم ہوگیا۔

اسی طرح ڈیلٹا وائرس کو پھیلاؤ کے دوران بھی بچے محفوظ رہے لیکن ان کی شرح 26 سے گھٹ کر  20.8فیصد ہوگئی۔

اس تحقیق سے یہ بات بھی سامنے آئی کہ اگر بچے ایسے گھر میں رہ رہے تھے جہاں والدین یعنی دونوں کی ویکسینیشن مکمل ہوچکی ہے تو ایلفا کی لہر میں بیماری کا خطرہ 71.7 فیصد جبکہ ڈیلٹا کی لہر میں 58.1 فیصد تک کم ہوگیاتھا۔

محققین کے مطابق والدین کی ویکسینیشن سے بھی ویکسینز سے محروم بچوں کو تحفظ ملتا ہے۔

جبکہ اس طرح کی ایک دوسری تحقیق میں گھر کے افراد، کیسز کی شرح اور ویکسینز کے بلاواسطہ تحفظ کے درمیان تعلق کی جانچ پڑتال کی گئی۔

محققین نے ان تحقیق کے نتیجے میں یہ بھی دریافت کیا کہ ڈیلٹا قسم کے پھیلاؤ سے پہلے جن افراد کو ویکسینیشن کے بعد بیماری کا سامنا ہوا، وہ ویکسینیشن نہ کرانے والوں کی نسبت کم متعدی ہوتے ہیں۔

جبکہ اس تحقیق میں فائزر ویکسین کی افادیت کے بارے میں دریافت کیا گیا تو معلوم ہوا کہ ڈیلٹا سے قبل فائزر ویکسین کی افادیت ویکسینیشن کے 10 سے  90  کے دوران 91.8 فیصد تھی اور ڈیلٹا کی لہرکے دوران اس کی افادیت کی شرح گھٹ کر65.5 ہوگئی تھی۔

واضح رہے کہ ویکسین کی افادیت کم ہونے کے باوجود محققین کا کہنا ہے کہ والدین کی ویکسینیشن بچوں کو وائرس سے بہت حد تک تحفظ دیتی ہے۔