حکومت آزاد کشمیر نے نادرا کے ساتھ مل کر سکسیشن سرٹیفکیٹ کے اجراء  کا فیصلہ کرلیا ہے۔

وزیراعظم آزاد جموں کشمیر سردار عبد القیوم نیازی سے ڈائریکٹر جنرل  نادرا بریگیڈیئر ریٹائرڈ طلعت قیوم کی سربراہی وفد کی ملاقات ہوئی جس میں سیکسیشن سرٹیفکیٹ کے اجراء کیلئے جلد قانون سازی کا بھی فیصلہ کیا گیا۔

اس موقع پر نادرا وفد نے وزیراعظم سردار عبد القیوم نیازی کو سکسیشن سرٹیفکیٹ پر بریفنگ دی۔

اجلاس میں بریفنگ دیتے ہوئے کہا گیا کہ وزیراعظم پاکستان عمران خان کے عوام دوست پالیسی کے تحت نادرا ملک بھر میں سکسیشن سرٹیفکیٹ پر کام کر رہا ہے۔ اسلام آباد، سندھ، کے پی اور پنجاب میں سکسیشن سرٹیفکیٹ کا آغاز کر دیا گیا ہے۔

وزیراعظم آزاد جموں کشمیر سردار عبد القیوم نیازی نے سکسیشن اور لیٹر آف ایڈمنسٹریشن کے اجراء  کیلئے جلد قانون سازی کا یقین دہانی کروائی۔

 اجلاس کی صدارت کرتے ہوئے عبد القیوم نیازی نے کہا کہ وزیراعظم پاکستان عمران خان کے ویژن کو عملی جامہ پہنانے کیلئے 15 15 گھنٹے کام کر رہے ہیں۔

وزیراعظم آزاد جموں کشمیر نے کہا کہ اوورسیز کشمیریوں کو ووٹ کا حق دینے کا فیصلہ ہو یا بلدیاتی الیکشن، وزیراعظم پاکستان کے ویژن کی روشنی میں عملی اقدامات کر رہے ہیں۔

عبد القیوم نیازی کا کہنا تھا کہ سکسیشن سرٹیفکیٹ کے اجراء  کیلئے تمام قانونی تقاضے جلد پورے کیے جائیں گے اور عوام دوست منصوبے کو لانچ کریں گے۔

وزیراعظم آزاد جموں کشمیر سردار عبد القیوم نیازی کا مزید کہنا تھا کہ پہلے مرحلے میں میرپور، مظفرآباد اور راولاکوٹ میں سکسیشن سرٹیفکیٹ یونٹ قائم کیے جائیں گے ، اس منصوبے کی لانچنگ سے عدالتوں سے وراثتی سرٹیفکیٹ کے کیسز کا بوجھ بھی کم ہوگا۔