فلپائنی حکام نے اعلان کیا ہے کہ 157 ممالک کے شہریوں کو مختصر دوروں کے لیے ویزا فری سفر کو دوبارہ شروع کرنے کی اجازت دی جائے گی۔

تفصیلات کے مطابق  10 فروری سے فلپائن کی حدود مکمل طور پر ویکسین شدہ سیاحوں کے لیے دوبارہ کھل جائیں گی اور قرنطینہ کرنے کی شرط کو ختم کردیا جائے گا۔

ساحلوں اور غوطہ خوری کے مقامات کے لیے مشہور جزیرہ نما ملک کے سیاحتی آپریٹرز بین الاقوامی زائرین میں کمی اور سفری پابندیوں کے سبب تباہ حالی کا شکار ہیں۔

صدارتی ترجمان کارلو نوگرلس نے ایک بریفنگ میں بتایا کہ سیاحت کی صنعت اب بحال ہو سکتی ہے اور یہ ملازمتوں، معاش اور ملک کی اقتصادی ترقی میں بڑا حصہ ڈال سکتی ہے۔

یاد رہے یکم دسمبر سے سیاحوں کی واپسی کا ایک پچھلا منصوبہ فلپائن میں پھیلنے والے کورونا اومیکرون ویریئنٹ کے ابھرنے کے باعث معطل کردیا گیا تھا۔

 فہرست میں شامل ممالک کے مکمل طور پر ویکسین شدہ سیاحوں کو فلپائن جانے سے کچھ دیر پہلے کوویڈ 19 کے لیے منفی ٹیسٹ ہونا ضروری ہے۔

اس فہرست میں چین،تائیوان اور ہندوستان کو شامل نہیں کیا گیا ہے۔ تاہم اس میں امریکہ، جنوبی کوریا، جاپان، آسٹریلیا، کینیڈا اور برطانیہ شامل ہیں۔

 ہیلتھ انڈر سکریٹری روزاریو ورجیر نے کہا کہ جب فلپائن میں کوویڈ 19 ٹرانسمیشن کی شرح اتنی زیادہ ہے تو بین الاقوامی مسافروں پر پابندی لگانے کا کوئی مطلب نہیں ہےان وجوہات کی بنیاد پر ہم نے پابندیوں کو کم کرنے کی سفارش کی۔

ان کا مزید کہنا تھا کہ غیر ویکسین شدہ غیر ملکیوں کے داخلے پر 16 فروری سے پابندی عائد کر دی جائے گی۔

فلپائنی حکومت نے حالیہ ہفتوں میں قومی دارالحکومت کے علاقے اور دیگر صوبوں میں اومیکرون ویرئینٹ میں پھیلاؤ کے سبب پابندیاں سخت کردی ہیں۔

یاد رہے ملک کے 110 ملین افراد میں سے تقریباً نصف مکمل طور پر ویکسین شدہ ہیں۔