کورونا سے لڑ کر صحتیاب ہونے والا شخص کورونا سے محفوظ ہے یا نہیں؟ سعودی وزارتِ صحت سے شہری کا سوال۔

 سعودی وزارت صحت کا کہنا ہے کہ کورونا سے شفایاب ہونے والا شخص دوبارہ کورونا میں مبتلا ہو سکتا ہے یا نہیں اس حوالے سے حتمی بات کہنا قبلِ از وقت ہے کیونکہ اس بارے میں طبی بنیادوں پر تحقیق ابھی جاری ہے۔

کورونا سے صحت یاب ہونے والوں کے جسم میں اس وائرس کے خلاف کتنی مدت تک کے لیے قوت مدافعت پیدا ہوتی ہے اس حد کا ابھی تعین نہیں کیا جا سکتا۔

سعودی ذرائع ابلاغ کے مطابق سماجی رابطے کی ویب سائٹ ٹوئٹرپر ایک شخص نے سعودی وزارتِ صحت سے سوال کیا کہ کورونا سے شفایاب ہونے والے کے جسم میں اس وائرس کے خلاف پیدا ہونے والی قوت مدافعت کتنےعرصے تک رہتی ہے آیا صحت یاب ہونے والا دوبارہ اس وائرس کا شکار ہو سکتا ہے؟

جس پر سعودی وزارتِ صحت نے جواب دیتے ہوئے کہا کہ ابھی تک اس حوالے سے حتمی طور پر نہیں کہا جاسکتا تاہم وائرس کے خلاف جسمانی قوت مدافعت کے حوالے سے طبی تحقیق ابھی جاری ہے۔

سعودی وزارت صحت نے کورونا ویکسین کے حوالے سے کہا کہ مملکت میں لگائی جانے والی کورونا ویکسین مکمل طورپرمحفوظ ہیں اور یہ وائرس کے حملے کی شدت کو کافی حد تک کم کر کے جسم میں اس مرض کے خلاف قوت مدافعت پیدا کرتی ہے اس لئے ویکسین لازمی لگوائیں۔