ساتویں بیگم کلثوم سیف اللہ خان نیشنل رینکنگ ٹینس ٹورنامنٹ 2021-2022 میں مردوں کا ٹائٹل عقیل خان نے جیت لیا ہے۔

تفصیلات کے مطابق پاکستان ٹینس فیڈریشن(پی ٹی ایف) کے زیر اہتمام پی ٹی ایف ٹینس کمپلیکس، اسلام آباد میں منعقد ہونیوالےساتویں بیگم کلثوم سیف اللہ خان نیشنل رینکنگ ٹینس ٹورنامنٹ میں مینز سنگلزکا فائنل عقیل خان اور ایم عابد کے درمیان کھیلا گیا جس میں عقیل خان نے ایم عابد کو 6-2، 6-3 سے ہرا کر ساتویں بیگم کلثوم سیف اللہ خان نیشنل رینکنگ ٹینس ٹورنامنٹ-22 2021کا ٹائٹل اپنے نام کرلیا۔

 پاکستان ٹینس فیڈریشن کے صدر سلیم سیف اللہ خان اس موقع پر مہمان خصوصی تھے، اس کے علاوہ ایٹین، ٹرانس ورلڈ، کلثوم ہسپتال اور جنرل ٹائرز کے کھلاڑیوں اور نمائندوں کی بڑی تعداد بھی موجود تھی۔

اس موقع پربوائز انڈر- 12 ٹیم کو اعزاز دینے کے لیے ایک خصوصی تقریب بھی منعقد کی گئی ساتھ ہی ساتھ لڑکیوں کی انڈر- 12  ٹیم جس نے پہلی ٹیم کے لیے فائنل ایونٹ کے لیے کوالیفائی کیا۔

 صدر پی ٹی ایف کی طرف سے دونوں ٹیموں کو نقد انعامات دیئے گئے، جنہوں نے کہا کہ یہ پاکستان کے لیے ایک بڑی کامیابی ہے اور یہ ٹیم نوجوان پاکستانی ٹینس کھلاڑیوں کی اگلی نسل کے لیے رول ماڈل تصور کی جائے گی۔

لڑکوں کے انڈر۔ 18 فائنل میں ہشیش کمارنے سمیع زیب کو 4-6, 6-1,7-6(6)سے،گرلزانڈر۔ 18 فائنل میں آمنہ علی قیوم نے نتالیہ زمان کو 6-2، 6-2سے شکست دی۔

لڑکوں کے انڈر۔ 14 فائنل میں اسد زمان نےایم سالارکو 4-1، 4-1سے شکست دی  جبکہ بوائز انڈر۔ 12 فائنل میں ابوبکر طلحہ نے عامر مزاری کو 4-2، 4-1سے شکست دیکر یہ ٹائٹل اپنے نام کرلیئے۔