قطر سے یوگینڈا جانے والی ایک پرواز کے دوران ایک خاتون کے ہاں بچی کی معجزاتی پیدائش ہوئی ہے۔

برطانوی خبر ایجنسی کے مطابق 5 دسمبر کو قطر ایئرویز کی معمول کی پرواز دوحا سے یوگینڈا کے شہر اینتبی جارہی تھی، جہاز میں مختلف شعبوں سے تعلق رکھنے والے افراد سوار تھے۔

طیارے میں ایک حاملہ خاتون بھی سوار تھیں جو سعودی عرب میں ملازمت کرتی تھیں لیکن اپنی پہلی اولاد کی پیدائش کے لیے آبائی علاقے جارہی تھیں۔

دوران پرواز ہی خاتون کو درد زہ اٹھنے شروع ہوئے، صورت حال بگڑتی دیکھ کر طیارے کے عملے نے مسافروں سے مدد کی اپیل کی۔

اتفاق سے طیارے میں کینیڈین نژاد خاتون ڈاکٹر بھی سوار تھیں، ڈاکٹر عائشہ خطیب نے مشکل کے اس وقت اپنی خدمات پیش کرنے کا فیصلہ کیا۔

ڈاکٹر عائشہ خطیب یونیورسٹی آف ٹورنٹو میں پروفیسر ہیں، اپنے انٹرویو میں انہوں نے بتایا کہ جب وہ وہاں پہنچیں تو مریضہ کے گرد بڑی تعداد میں مسافر موجود تھے۔ جسے دیکھ کر وہ سمجھیں کہ شائد مریض کو دل کے دورے جیسا کوئی سنگین مسئلہ درپیش ہے۔

ڈاکٹر عائشہ نے مزید کہا کہ جب قریب جاکر دیکھا تو پتہ چلا کہ حاملہ خاتون کے ہاں بچے کی پیدائش کا عمل شروع ہوچکا ہے۔ اتفاق سے پرواز میں ایک خاتون نرس اور بچوں کے امراض کی ماہر ڈاکٹر بھی موجود تھیں۔

ڈاکٹر عائشہ خطیب نے ان دونوں کی مدد سے خاتون کے ہاں بچی کی پیدائش کا عمل آسان بنایا۔

ڈاکٹر عائشہ خطیب نے کہا کہ بچی پیدائش کے بعد غیر معمولی طور پر بہت رو رہی تھی، جس پر انہیں بہت تشویش ہوئی، انہوں نے بچی کو فوری طور پر ماہر اطفال کے حوالے کیا۔ جس نے مکمل معائنے کے بعد بچی کو صحت مند قرار دے دیا۔

صورت حال نارمل ہونے پر ڈاکٹر عائشہ نے جہاز میں صحتمند بچی کی پیدائش کا اعلان کیا ، جس پر پورا جہاز تالیوں سے گونج اٹھا۔

ڈاکٹر عائشہ خطیب کی خوشی کا ٹھکانہ اس وقت نہ رہا جب انہوں نے سنا کہ ماں نے بچی کا نام ان کے نام پر معجزہ مریم رکھا ہے۔

ڈاکٹر عائشہ نے گلے میں سونے کا ایک ہار پہنچا ہوا تھا جس میں عربی زبان میں عائشہ تحریر تھا۔ جو انہوں نے بچی کو تحفے میں دے دیا۔

ڈاکٹر عائشہ کہتی ہیں کہ سونے کا وہ ہار بچی کو ہمیشہ یہ یاد دلائے گا کہ اسی نام کی ایک ڈاکٹر اسے دریائے نیل کے اوپر فضا میں 35 ہزار فٹ کی بلندی پر دنیا میں لانے کا ذریعہ بنی تھی۔

انہیں 18 دسمبر کو دوبارہ طبی عملے کی تربیت کے لیے یوگینڈا واپس بلایا گیا اور اتفاق سے اس پرواز میں بھی ایک طبی مسئلے کے لئے مدد کی اپیل کی گئی، پرواز میں ایک اور ڈاکٹر بھی تھیں ، میں نے ان سے کہا کہ میں 15 روز قبل ایک اہم کام کرچکی ہوں اب ان کی باری ہے۔