کراچی میں عالمی وبا کورونا کی ممکنہ پانچویں لہر کے پیش نظر نئے ویرینٹ اومیکرون کے مشتبہ کیسز میں بتدریج اضافہ جاری ہے۔

 اب تک کراچی میں اومیکرون کے 54 کیسز کی تصدیق ہو چکی ہے جبکہ کیسز سینکڑوں کی تعداد میں رپورٹ ہورہے ہیں ۔

 کراچی میں کورونا کے مثبت کیسزکی شرح 8.91 تک پہنچ گئی ہے۔

محکمہ صحت سندھ نے کورونا اور اومیکرون کے تیزی سے پھیلاؤ کے پیش نظر کاروباری اوقات محدود کرنے اور اسکولزبند کرنے پر غور شروع کردیا ہے۔

 اس حوالے سے سندھ حکومت دو یا تین روز میں فیصلہ کرے گی۔

کراچی میں اومیکرون کے مشتبہ کیسز میں اضافہ

کراچی میں اومیکرون مقامی سطح پر پھیلنا شروع ہو گیا ہے اور کیسز میں مسلسل اضافہ ہورہا ہے۔

ڈاؤ یونیورسٹی اسپتال کے پروفیسرسعید خان کا اس حوالے سے کہنا ہےکہ اب تک کراچی میں 54 کیسز کی تصدیق کی گئی جبکہ کیسز سینکڑوں کی تعداد میں رپورٹ ہورہے ہیں۔

انہوں نے بتایاکہ اومیکرون کی تصدیق بذریعہ جینوم سیکیونسنگ ہوتی ہے،جینوم سیکیونسنگ وقت طلب مرحلہ ہے۔

پروفیسرسعید خان نے کہاکہ کراچی کے تمام اضلاع سے کیسز رپورٹ ہورہے ہیں۔

24 گھنٹوں کے دوران کورونا سے دو افراد انتقال کر گئے

گزشتہ 24 گھنٹوں کے دوران ملک بھر میں کورونا سے مزید 2 افراد انتقال کرگئے۔

نیشنل کمانڈ اینڈ آپریشن سینٹر کے مطابق 24 گھنٹوں کے دوران ملک بھر میں کورونا کے مزید 630 نئے کیسز رپورٹ ہوئے۔

گزشتہ 24 گھنٹوں کے دوران 44 ہزار198 کورونا کے ٹیسٹ کیے گئے جبکہ ملک بھر میں کورونا مثبت کیسز کی شرح 1.42 فیصد ہوگئی ہے۔