کراچی میں ممکنہ طوفانی بارشوں کے پیش نظر ڈی جی سی اے اے کی ہدایت پر کراچی ایئرپورٹ  پر الرٹ جاری کردیا گیا۔

کراچی: ڈی جی سول ایوی ایشن کی ہدایت پر کراچی ایئرپورٹ پر ممکنہ بارشوں کے پیش نظر الرٹ جاری کردیا گیا ہے۔

سی اے اے نے کراچی میں ممکنہ بارشوں سے تمام شعبوں کو الرٹ رہنے کی ہدایت کردی۔

سول ایوی ایشن نے آج سے 5 جنوری تک کراچی میں ممکنہ بارشوں کے پیش نظر اقدامات کی ہدایت کی ہے۔

سول ایوی ایشن کی جانب سے جاری ہدایات میں چھوٹے طیاروں کو محفوظ جگہ پر پارک کرنے کا کہا گیا ہے۔

سول ایوی ایشن کے مطابق چھوٹے طیاروں کے پروں سے وزن بند کر کے پارک کیا جائے، ممکنہ بارشوں کے دوران کیڑے مکوڑے جمع ہونے پر پرندے آسکتے ہیں۔

فیومیگشن کا سامان تیار رکھنے اور پرندوں کو بھگانے کے لیے برڈ شوٹرز کو رن وے کے اطراف الرٹ رکھنے کی ہدایت کی گئی ہے۔

یاد رہےڈائریکٹر محکمہ موسمیات سردار سرفراز نے بتایا ہے کہ کراچی میں گرج چمک کے ساتھ درمیانی اور کہیں تیز بارش کا امکان ہے، 4 جنوری (کل) سے شہر میں سسٹم کے تحت بوندا باندی بھی ہوسکتی ہے۔

ڈی جی میٹ سردارسرفراز نے بتایاکہ سسٹم ملک کے شمالی علاقوں میں بھی بارش کا باعث بن سکتا ہے،کراچی میں 3 جنوری (آج) تک سرد ہوائیں مسلسل چل سکتی ہیں۔

کراچی میں 4 اور 6 جنوری کو موسم سرما کی دوسری بارش کا امکان ہے۔

مغربی ہواؤں کا سسٹم طاقتور ہے

محکمہ موسمیات کے مطابق نیا مغربی سلسلہ موسم سرما کے سابقہ سسٹم سے زیادہ طاقتورہے ، بارش اور ہواؤں کا سسٹم بلوچستان کے اضلاع پر زیادہ شدت سے اثرانداز ہوگا۔

ملک میں کہاں کہاں بارشیں متوقع ہیں؟

محکمہ موسمیات نے 3 جنوری کی شام/رات سے 6 جنوری کے دوران کوئٹہ، زیارت، پشین، ژوب، قلعہ عبداللہ، نوکنڈی، دالبندین، نوشکی، تربت، پنجگور، گوادر، پسنی اور جیوانی میں بار ش کی پیش گوئی کی ہے۔

اس کے علاوہ لسبیلہ، قلات، خضدار، مستونگ،نصیر آباد، جعفرآباد، جھل مگسی، بولان، سبی، کوہلو، بارکھان، ڈیرہ غازی خان، لیہ، راجن پور، ملتان، خانیوال، ساہیوال، اوکاڑہ، بہاولنگر، بہاولپور، رحیم یار خان، سکھر، لاڑکانہ اور شہید بینظیر آباد میں بھی بارش کا امکان ہے۔

کراچی، دادو،جامشورو، میرپورخاص اور خیرپور میں تیز ہواؤں کے ساتھ بارش  کی پیش گوئی کی ہے۔