پاکستان تحریک انصاف حلقہ 257 کے رکن قومی اسمبلی آفتاب صدیقی نے کہا ہے کہ پی ٹی آئی پیپلز پارٹی کے کالے قانون کو نہیں مانتی۔

آفتاب صدیقی نے صدر کوآپریٹو مارکیٹ کی بحالی تقریب سے خطاب کرتے ہوئے کہا کہ یہاں نعرے صرف وزیر اعظم پاکستان عمران خان کے لگنے چاییں، ہم عمران خان کے ٹائیگر ہیں، وزیر اعظم کے وڑن کے تحت ہم کام کر رہے ہیں۔

ان کا کہنا تھا کہ 14 نومبر کو جب آگ لگی یہاں کوئی نہیں تھا، فائر ٹینڈر میں نا پانی تھا نہ ہی پیٹرول، 14 سال میں پیپلز پارٹی نے کوئی ریسکیو کا ادارہ نہیں بنایا، مجھ سے گورنر عمران اسماعیل نے بات کی اور کہا کہ یہاں تاجروں کی دکانوں کو آباد کرنا ہے۔

انہوں نے کہا کہ 5 کروڑ کی لاگت سے یہ مارکیٹ کی بحالی ہوئی ہے، 15 سال سے پیپلز پارٹی کی حکومت ہے لیکن کراچی کا حال سب کے سامنے ہے، پی ٹی آئی پیپلز پارٹی کے کالے قانون کو نہیں مانتی۔

پاکستان تحریک انصاف حلقہ 257 کے رکن قومی اسمبلی آفتاب صدیقی نے کہا کہ جماعت اسلامی اور پی پی پی کے درمیان بلدیاتی بل پر ہونے والے معاہدے کو نہیں مانتے۔

دوسری جانب خرم شیر زمان نے صدر کوآپریٹو مارکیٹ کی بحالی تقریب سے خطاب کرتے ہوئے کہا کہ ہم نے دیکھا تھا لوگ اس سانحہ کے بعد بہت پریشان تھے، گورنر سندھ نے کہا تھا اس مارکیٹ کو بنانا ہے۔

ان کا کہنا تھا کہ یہاں رنگ و روغن بجلی اور شٹرنگ کا کام کیا گیا، انسان نیت کرتا ہے باقی کام اللہ پاک کرواتا ہے، یہ تربیت ہمارے وزیر اعظم عمران خان نے ہمیں دی ہے۔

ایم پی اے خرم شیر زمان نے کہا کہ مارکیٹ کی بحالی پر حکومتی پیسا خرچ نہیں ہوا بلکہ آفتاب صدیقی نے اپنے تئیں کرایا ہے۔