اسد قیصر نے کہا ہے کہ افغان قیادت کون سی ہوگی یہ فیصلہ کرنا افغان عوام کا حق ہے۔

 اسپیکر قومی اسمبلی اسد قیصر نے افغانستان کے مسائل پر کل جماعتی کانفرنس سے خطاب کرتے ہوئے کہا کہ اس خطے کا سب سے مشکل مرحلہ افغانستان میں جاری ہے۔

انہوں نے کہا کہ امریکہ نے اپنی آزادی حاصل کرلی ، افغان قیادت کون سی ہوگی یہ فیصلہ کرنا افغان عوام کا حق ہے ، افغانستان کی مشکلات دور کرنے کے لئے پارلیمان کی خصوصی کمیٹی بنائی ہے۔

 اسد قیصر نے کہا کہ پارلیمانی کمیٹی افغان حکومت اور عوام کے خوراک ادویات تجارت کے لئے کوشاں ہے ، افغانستان کے ایشو پر موجودہ حکومت نے اسلام آباد میں او آئی سی کانفرنس کروائی ، مارچ میں او آئی سی کانفرنس ایک بار پھر اسلام آباد میں ہورہی ہے۔

 اسپیکر قومی اسمبلی نے کہا کہ پاک افغان پارلیمانی گروپ عوام کے درمیان رابطوں میں اہم کردار ادا کررہی ہے ، افغان بارڈر کے قریب اسپتال بنانے جارہے ہیں ، ہیلتھ ویزہ پالیسی آسان بنانے جارہے ہیں۔

انہوں نے کہا کہ افغانستان سے آنے والے مریض کے ساتھ بچوں کو بھی ویزہ دیا جائے گا ، افغان طلبا کو پورے تعلیمی دورانیے کا ویزہ دیا جائے گا ، افغان طلبا کا ویزہ اگر پاکستان میں ختم ہوگا تو یہیں توسیع ہوگی۔

 اسد قیصر نے کہا کہ کل کابینہ افغانستان میں عالمی تجارت کے فروغ کے لئے اہم فیصلہ کرنے جارہی ہے۔