وزیر خارجہ نے کہا ہے کہ پاکستان اسپین کے ساتھ اپنے دو طرفہ تعلقات کو خصوصی اہمیت دیتا ہے۔

وزیر خارجہ مخدوم شاہ محمود قریشی کی میڈرڈ اسپین میں کانگریس کی فارن ریلیشنز کمیٹی کے اراکین سے ملاقات ہوئی، ہسپانوی کانگریس کے وفد کی قیادت مسٹر پاؤ میری کلوزے نے کی۔

دوران ملاقات پاکستان اور اسپین کے درمیان دوطرفہ تعلقات کے مختلف پہلوؤں پر تبادلہ خیال کیا گیا۔

اس موقع پر اسپین کی فارن ریلیشنز کمیٹی کے اراکین نے وزیر خارجہ کو اسپین آمد پر خوش آمدید کہا جبکہ اراکین فارن ریلیشنز کمیٹی نے اسلام آباد میں پاکستان اور اسپین کے سفارتی تعلقات کے ستر سالہ جشن کو شایان شان طریقے سے منانے پر وزیر خارجہ کا شکریہ ادا بھی کیا۔

ملاقات میں شاہ محمود قریشی نے کہا کہ پاکستان اسپین کے ساتھ اپنے دو طرفہ تعلقات کو خصوصی اہمیت دیتا ہے، پاکستان اور سپین کے مابین تجارتی، اقتصادی، و باہمی دلچسپی کے شعبوں میں دو طرفہ تعاون بڑھانے کے وسیع مواقع موجود ہیں۔

انہوں نے کہا کہ پاکستان اقتصادی ترجیحات پر توجہ مرکوز کئے ہوئے ہے اور ہسپانوی وزیر خارجہ کے حالیہ دورہ ء پاکستان سے دو طرفہ تعلقات وسعت پذیر ہوئے۔

  ملاقات میں وزیر خارجہ نے سیاسی اور حکومتی سطح پر دو طرفہ تعاون کو فروغ دینے کے لیے پارلیمانی وفود کے تبادلوں کی اہمیت پر زور دیا اور کہا کہ پاکستان دونوں ممالک کے درمیان کثیر الجہتی شعبہ جات میں دو طرفہ تعاون بڑھانے کیلئے کوشاں ہے۔

شاہ محمود قریشی کا کہنا تھا کہ علاقائی سلامتی اور روابط کے فروغ کے لیے پرامن اور مستحکم افغانستان انتہائی اہمیت کا حامل ہے، پاکستان عالمی برادری کے ساتھ مل کر افغانستان کی صورتحال کو بہتر بنانے اور افغان عوام کو معاشی بحران سے نکالنے کیلئے مسلسل کوششیں جاری رکھے ہوئے ہے۔

وزیر خارجہ نے کہا کہ پاکستان نے افغانستان میں عدم استحکام کی بھاری قیمت چکائی ہے، ہمیں ماضی کی غلطیوں سے سبق سیکھتے ہوئے افغانستان میں قیام امن کے میسر موقع سے فائدہ اٹھانے کیلئے مشترکہ کاوشیں بروئے کار لانے کی اشد ضرورت ہے۔

ان کا کہنا تھا کہ افغانستان میں عدم استحکام نہ صرف پاکستان اور خطے بلکہ سب کیلئے خطرے کا باعث بن سکتے ہیں، 15 اگست کے بعد ہم نے افغانستان کے حوالے سے یکساں لائحہ عمل اپنانے کیلئے، چھ قریبی ہمسایہ ممالک پر مشتمل پلیٹ فارم قائم کیا۔

وزیر خارجہ نے افغان شہریوں کو درپیش انسانی المیے سے نمٹنے کے لئے عالمی برادری کی جانب سے مؤثر اور ٹھوس اقدامات اٹھانے کی ضرورت پر زور دیتے ہوئے کہا کہ پاکستان خطے کے تمام ہمسایہ ممالک کے ساتھ پرامن تعلقات کا خواہاں ہے۔

شاہ محمود قریشی نے کہا کہ ہندوستان کی جانب سے مقبوضہ جموں و کشمیر میں اٹھائے گئے، 5 اگست 2019 کے غیر قانونی اور یکطرفہ اقدامات نے، خطے کے امن کو شدید خطرات سے دوچار کر دیا ہے۔

ملاقات میں وزیر خارجہ نے اسپین میں مقیم، ایک لاکھ پچیس ہزار سے زائد پاکستانیوں کو دو طرفہ تعلقات کے استحکام میں، مضبوط بندھن قرار دیتے ہوئے کمیٹی کو پاکستانی نژاد شہریوں کو درپیش مشکلات سے بھی آگاہ کیا۔

انہوں نے کہا کہ مقامی قوانین کی وجہ سے اسپین میں مقیم پاکستانیوں کو، پاکستان کی شہریت ترک کرنا پڑتی ہے، توقع ہے کہ دونوں ممالک کے باہمی فائدے کے لیے اس مسئلے کا خوشگوار حل نکالا جائے گا۔

وزیر خارجہ مخدوم شاہ محمود قریشی نے سپین میں کانگریس کی فارن ریلیشنز کمیٹی کے اراکین کو دورہ ء پاکستان کی دعوت دی جس پر اسپین میں کانگریس کی فارن ریلیشنز کمیٹی کے اراکین نے افغانستان سے ہسپانوی شہریوں کے محفوظ انخلاء میں بھرپور معاونت کی فراہمی اور دورہ ء پاکستان کی دعوت پر وزیر خارجہ مخدوم شاہ محمود قریشی کا شکریہ ادا کیا۔