؎وزیر خارجہ مخدوم شاہ محمود قریشی نے اپنے گنی ہم منصب ڈاکٹر موریسنڈا کویاتے سے ٹیلیفونک رابطہ کیا جس میں دونوں وزرائے خارجہ نے دونوں ممالک کے درمیان پائیدار شراکت کے لیے دوطرفہ میکانزم قائم کرنے پر بھی اتفاق کیا۔

 ٹیلیفونک رابطے کے دوران دونوں وزرائے خارجہ نے اپنے تاریخی دوستانہ اور باہمی اعتماد پر مبنی تعلقات کا تذکرہ کیا جو مشترکہ تاریخ، علاقائی اور بین الاقوامی امور پر ہم آہنگی سے منسلک ہیں۔

اس  موقع پر دونوں وزرائے خارجہ نے پاکستان اور گنی کے درمیان دوطرفہ تعاون کا جائزہ لیا جبکہ کثیرالجہتی فورمز پر روایتی باہمی تعاون اور ہم آہنگی کو سراہا۔

ٹیلیفونک رابطے کے دوران وزیر خارجہ شاہ محمود قریشی نے گنی کے ساتھ خوشگوار تعلقات کو مزید مضبوط بنانے کی اہمیت پر زور دیا جبکہ وزیر خارجہ نے اقوام متحدہ، افریقہ یونین، او آئی سی جیسے فورمز میں، گنی کی مثبت  شراکت کو سراہا

وزیر خارجہ شاہ محمود قریشی نے پاکستان اور گنی کے درمیان تجارت، سیاست ، دفاع اور انسداد دہشتگردی سمیت باہمی دلچسپی کے شعبوں میں دو طرفہ تعلقات کو مزید مستحکم بنانے کے عزم کا اعادہ کیا۔

گنی کے وزیر خارجہ ڈاکٹر موریسنڈا کویاتے نے کہا کہ گنی پاکستان کو بہت عزت کی نگاہ سے دیکھتا ہے، گنی، دنیا میں قیام امن کیلئے پاکستان کے کلیدی کردار کا معترف ہے۔