مصطفیٰ کمال کا کہنا ہےکہ آصف علی زرداری چاہیں تو حکومت گرسکتی ہے۔

پاک سرزمین پارٹی کے سربراہ مصطفیٰ کمال نے پریس کانفرنس کرتے ہوئے کہاکہ ایک خاص مقصد سے اسلام آباد آیا ہوں۔

انہوں نے کہاکہ آج پی ٹی آئی حکومت زرداری کی مرہون منت ہے، زرداری صاحب کو سندھ میں پوچھنے والے کوئی نہیں۔

انہوں نے کہاکہ پیپلزپارٹی سندھ کے بلدیاتی انتخاب کے قانون میں آئینی خلاف ورزیاں کر رہی ہے ، پیپلزپارٹی نے سندھ میں ترمیم کے زریعے الیکشن کمیشن ہی نکال دیا، پیپلزپارٹی بلدیاتی الیکشن کے لئے اپنا الیکشن کمیشن بنائے گی۔

مصطفیٰ کمال نے کہاکہ آج سندھ میں کچرا اٹھانے کا انچارج وزیر اعلیٰ ہے، سندھ میں جمہوریت خالص نہیں ہے، کراچی سے ادارے چھین لئے ہیں، سندھ کے وزراء کہہ رہے ہیں کہ ہم نے پہلے سے زیادہ اختیارات دیئے ہیں، لگ نہیں رہا کہ سندھ پاکستان کی حکومت کا حصہ ہے۔

انہوں نے کہاکہ ہر طبقے کو حکمرانی دینے کے لئے دنیا نے بلدیاتی نظام بنایا، ستر سالوں سے وزیر اعلیٰ سندھی بن رہا ہے کوئی پختون یا کوئی اور نہیں بنا۔

پاک سرزمین پارٹی کے سربراہ نے کہاکہ کراچی میں جوان بے روزگاری سے تنگ آکر خودکشی کررہے ہیں، پورے ملک میں کوٹہ سسٹم موجود نہیں۔

انہوں نے کہاکہ گزشتہ 13 سالوں میں 10 ہزار 242 ارب روپے کراچی پر خرچ ہوئے ، سندھ کے 11 ہزار اسکول گھوسٹ ہیں۔

مصطفیٰ کمال نے کہاکہ پیپلزپارٹی سندھ کو ذاتی ریاست بنارہی ہے ، پیپلزپارٹی کو سندھ میں کوئی روکنے والا نہیں، سندھ کےشہری علاقےگروی رکھ دیےگئے۔

یہ بھی پڑھیں: تبدیلی کا اصل چہرہ سامنے آنے پر لوگوں کے ہوش اڑ جائیں گے، حمزہ شہباز

 مصطفیٰ کمال نے کہاکہ سندھ کے بلدیاتی انتخابات کا مسئلہ مقامی نہیں بلکہ قومی سلامتی کا مسئلہ ہے، تیرہ سالوں سے وفاق سے دس ہزار دو سو بیالیس ارب روپے ملے اور خرچ ہو گئے۔

پاک سرزمین پارٹی نے کہاکہ سندھ انسانوں کے رہنے کی بدترین جگہ ہے، تئیس سو ارب روپے تعلیم پر خرچ کر نے کے باوجود ستر لاکھ بچے اسکول نہیں جا رہے، سندھ میں اسکول ہی گھوسٹ ہیں۔

 مصطفیٰ کمال نے مزید کہاکہ پیپلزپارٹی نے 2013 میں بلدیاتی حکومت کے اسی فیصد اختیارات لے لئے، اب باقی بچے اختیارات بھی لے رہے ہیں، پیپلزپارٹی سندھ کو اپنی ذاتی جاگیر بنا رہی ہے اور کوئی روکنے والا نہیں۔