چاغی: چیئرمین سینیٹ صادق سنجرانی کے سب سے چھوٹے بھائی ٹریفک حادثے میں جاں بحق ہوگئے ہیں۔

خاندانی ذرائع نے بتایا کہ سالار خان سنجرانی لسبیلہ کے علاقے اوتھل میں افسوس ناک حادثے کا شکار ہوئے۔

ذرائع کے مطابق سالار خان کار میں کراچی سے کوئٹہ جا رہے تھے کہ گاڑی آئل ٹینکر سے ٹکرا گئی۔

حادثے میں کار ڈرائیور محمد یونس موقع پر جاں بحق ہو گئے، جبکہ سالار سنجرانی کو اوتھل ہسپتال میں طبی امداد دے کر شدید زخمی حالت میں کراچی روانہ کیا گیا۔

خاندانی ذرائع کا کہنا ہے کہ سالار خان سنجرانی کراچی جاتے ہوئے ایمبولینس میں دم توڑ گئے۔

سابق وزیر داخلہ سینیٹر رحمان ملک نے چئیرمین سینیٹ محمد صادق سنجرانی کے چھوٹے بھائی کے ٹریفک حادثے میں جاں بحق ہونے پر دکھ اور افسوس کا اظہار کیا ہے۔

رحمان ملک نے کہا کہ صادق سنجرانی کے چھوٹے بھائی کی حادثے میں وفات کا سن کر دلی دکھ ہوا، صادق سنجرانی اور سوگوار خاندان کے غم میں برابر کے شریک ہیں، اللہ تعالیٰ مرحوم کی مغفرت اور سوگوار خاندان کو صدمہ برداشت کرنے کی ہمت عطا فرمائے۔

رہنما پیپلز پارٹی ایم این اے ڈاکٹر مہرین بھٹو، اسپیکر بلوچستان صوبائی اسمبلی میر جان محمد خان جمالی، وزیر اعلیٰ پنجاب سردار عثمان بزدار ، مرکزی اطلاعات سیکرٹری پیپلزپارٹی شازیہ عطا مری سمیت دیگر سیاسی رہنماوں نے بھی چیئرمین سینیٹ صادق سنجرانی کے بھائی کے انتقال پر افسوس کا اظہار کیا۔