حمل ٹھہرنے کے بعد خواتین کو اپنی اور بچے کی صحت کے لئے اپنی غذا کا بھرپور خیال رکھنا پڑتا ہے، تاہم زچگی کے بعد اضافی وزن خواتین کے لئے ایک بڑا مسئلہ بن جاتا ہے۔

جہاں زچگی کے بعد خواتین کو بچے کی صحت و تندرستی کی فکر رہتی ہے وہیں انہیں یہ بات بھی ستاتی ہے کہ ان کا جسم بھدا ہو گیا ہے اور وزن بےحد بڑھ گیا ہے۔

 حمل کے دوران اور زچگی کے بعد بہت سی خواتین کا جسم حقیقی معنوں میں  پھول جاتا ہے اور وزن بڑھ جاتا ہے یہ ایک عام سی بات ہے مگر اس وزن کو کیسے کم کیا جائے اور کس طرح اپنے جسم کو پہلے جیسے شیپ میں واپس لایا جا سکتا ہے آیئے اس حوالے سے آپ کو چند  نسخے بتاتے ہیں۔

خواتین زچگی کے بعد وزن کیسے گھٹائیں؟

صحت مند غذا

زچگی کے بعد اکثر خواتین بچے کے خیال میں لگ جاتی ہیں اور اپنی صحت کو نظرانداز کر دیتی ہیں، جبکہ اس وقت انہیں سب سے زیادہ اپنی صحت کا خیال رکھنے کی ضرورت ہوتی ہے، زچگی کے بعد خواتین کو کمزوری دور کرنے کے لئے صحت مند غذا کا انتخاب کرنا چاہیئے اور پھلوں اور سبزیوں کا بھرپور استعمال کرنا چاہیئے۔

خواتین کو چاہیئے کہ سرخ گوشت کا استعمال ممکن حد تک کم کریں کیونکہ اس میں چکنائی بہت زیادہ ہوتی ہے اور سرخ گوشت کے بجائے مچھلی اور مرغی استعمال کریں۔

 اس کے علاوہ بغیر بالائی کے دودھ اور دہی کا استعمال کریں۔

 بادام، گاجروں اور دیگر تازہ سبزیوں کا استعمال بھی زچہ کی صحت کے لئے مفید ہے۔

ماہرین کا کہنا ہے کہ اگر ماں بچے کو اپنا دودھ پلا رہی ہو تو ماں کا وزن بڑھ نہیں پائے گا جس سے ماں اور بچے دونوں کی صحت پر مفید اثرات مرتب ہوں گے۔

ورزش

دوران حمل ماں کے پیٹ اورکولہوں کے پٹھے پھیل جاتے ہیں۔ انہیں واپس اپنی شکل میںلانے کے لئے باقاعدہ ورزش کی ضرورت ہوتی ہے، ہمارے ہاں زچہ کو اور خاص طور پر سی سیکشن سے گزرنے والی خواتین کو بالخصوص لمبے عرصے تک بستر پرآرام کے لئے لٹا دیا جاتا ہے جو بالکل غلط طریقہ ہے۔

گائنا کالوجسٹ ڈاکٹر کنیز فاطمہ کے مطابق خواتین کو زچگی کے دوسرے ہی دن متحرک کردینا چاہئے تاکہ ان کا جسم بے ڈول ہونے سے بچ جائے اور بیٹھے یا ہر وقت لیٹ رہنے کی وجہ سے وزن میں مزید اضافہ نہ ہو۔

احتیاطی تدابیر

حاملہ اور زچہ خواتین کو چاہیئے کہ تلی ہوئی اشیا مرغن غذائیں‘ مٹھائیاں، کیک، پڈنگ اورچکنائی والی خوراک سے بالکل پرہیز کریں۔

 ساتھ ہی کسی اچھی ڈائیٹیشن سے مشورہ کرکے ایک متوازن غذا کا چارٹ تجویز کروا لیں اور اس پر سختی سے عمل کریں۔

تیز پیدل چلنے (واک اور جاگنگ) سے بھی آپ اپنا وزن کم کرسکتی ہیں، آغاز میں اس کا دورانیہ کم رکھیں اورجب ٹانگوں کے پٹھے اور پاﺅں اس کے عادی بن جائیں تو اس دورانیے میں اضافہ کر دیں۔

زیادہ سے زیادہ پانی پینے سے بھی جسم کی اضافی چربی گھلتی ہے ساتھ ہی جلد تروتازہ رہتی ہے۔