کہیں بارش و برفباری تو کہیں گرد آلود ہواؤں کے باعث ملک بھر میں جاتی سردی پھر لوٹ آئی ہے۔

محکمہ موسمیات کے مطابق آج  اسلام آباد کے مختلف علاقوں میں بارش کا سلسلہ جاری رہیگا جبکہ بارش کے باعث سردی کی شدت میں اضافہ بھی متوقع ہے۔

اسکے علاوہ پنجاب میں بھی تیز ہواؤں کے ساتھ بارش کا امکان ہے  تاہم ڈی جی خان، ملتان، لیہ، خانیوال،راجن پور،بہاولپور، اور بہاولنگر میں تیزہواؤں کے ساتھ ہلکی بارش کی توقع ہے۔

 محکمہ موسمیات کے مطابق آج پشاور سمیت خیبر پختو نخوا میں بارشوں کا سلسلہ وقفے وقفے سے جاری رہیگا جبکہ بارش کے ساتھ ساتھ صوبے کے بیشتر شہروں میں برف باری کا بھی امکان ہے۔

سندھ کی بات کی جائے تو آج  سندھ کے بیشتر اضلاع میں موسم خشک اور سرد رہے گا البتہ سکھر، خیرپور ، لاڑکانہ، جیکب آباد، شہید بینظیر آباد اور موہنجو داڑو کے چند مقامات پر بارش کا بھی امکان ہے۔

بلوچستان کے بیشتر  اضلا ع  میں بھی موسم خشک اور سرد رہے گا تاہم کوئٹہ، زیارت،بارکھان، پشین، ژوب، قلعہ عبداللہ،قلعہ سیف اللہ، نوکنڈی، دالبندین،موسیٰ خیل،ہرنائی، لورالائی،مستونگ، چمن اور نوشکی میں بارش اور برفباری کا امکان ہے۔

 واضح رہے کہ آج ریکارڈ کیے گئے کم ازکم درجہ حرارت میں لہہ منفی 12،کالام منفی 08، اسکردو منفی07،استور، بگروٹ،پاراچنار منفی 05، ہنزہ منفی 04، مالم جبہ، زیارت منفی 03، بارہ مولہ، شوپیاں، پلوامہ منفی 02، دیر، قلات، چترال اور دروش میں منفی 01ڈگری سینٹی گریڈ ریکارڈ کیا گیا ہے۔