لاہور میں ایف بی آر کے ڈپٹی کمشنر پر فائرنگ کرنے والے ملزمان اور سہولت کار کو گرفتار کرلیا گیا ہے۔

ترجمان پنجاب پولیس کے مطابق پولیس نے ڈپٹی کمشنر سلمان بٹ پر فائرنگ کرنے والے شوٹرز اور سہولت کار کو گرفتار کرلیا ہے۔

ترجمان کے مطابق شوٹرز اور سہولت کار کی شناخت سیف سٹیز اتھارٹی کے کیمروں سے کی گئی، شوٹر اعجاز اور موسیٰ مسیح اور ان کو ہائر کرنے والے رانا تفسیر سے تفتیش جاری ہے۔

ترجمان پنجاب پولیس نے کہا کہ واقعے کے مرکزی ملزم عثمان جاوید کی گرفتاری کیلئے چھاپے مارے جارہے ہیں۔

انہوں نے کہا کہ وزیر اعلیٰ پنجاب اور آئی جی پنجاب نے فائرنگ کے واقعے کا نوٹس اور ملزمان کی گرفتاری کا حکم دیا تھا، سی سی پی او لاہور اور ڈی آئی جی انویسٹی گیشن کیس کی خود نگرانی کر رہے تھے۔

ترجمان نے کہا کہ ملزمان کی شناخت اور گرفتاری میں پولیس، سیف سٹیز اتھارٹی اور تمام متعلقہ اداروں نے جوائنٹ آپریشن کیا۔

یاد رہے 27 دسمبر کو لاہور میں ڈپٹی کمشنر سلمان علی پر قاتلانہ حملہ ہوا تھا ۔ پولیس نے واقعہ کے بارے میں اپنا بیان دیتے ہوئے کہا تھا کہ پنجاب کے شہر لاہور کے مسلم ٹاؤن میں ڈپٹی کمشنر سلمان علی کی گاڑی پر فائرنگ ہوئی تھی جس میں وہ اور علی سولنگی محفوظ رہے۔

پولیس کا کہنا تھا کہ فائرنگ نامعلوم موٹر سائیکل سواروں نے گاڑی کی پچھلی سائیڈ پر کی تھی۔

واضح رہے کہ سلمان علی اور علی سولنگی ان لینڈ ریوینو کے ڈپٹی کمشنرز ہیں۔