جنوبی کوریا میں صدارتی انتخابات کی مہم میں شمالی کوریا کے ایٹمی پروگرام کے بجائے گنج پن ایک اہم موضوع بن گیا ہے۔

جنوبی کوریا کی حکمران جماعت کے صدارتی امیدوار لی جے میونگ خود تو گنجے نہیں ہیں لیکن انہوں نے ملک میں ہونے والے حالیہ صدارتی انتخابات کی مہم میں گنج پن سے متعلق موضوع چھیڑ دیا جس نے سب کی توجہ حاصل کرلی ہے۔

لی جے میونگ نے انتخابی مہم میں اعلان کیا ہے کہ وہ انتخابات جیتنے کے بعد گنجے پن کا علاج مفت میں کروائیں گے اور انہوں نے ایک بیان میں بالوں سے محروم افراد کا ہیئر ٹرانسپلانٹ سرکاری خرچے پر کرانی کی تجویز بھی دے دی۔

جنوبی کوریا میں ہمیشہ صدارتی انتخابات میں شمالی کوریا کے نیوکلیئر پروگرام اور تعلقات ، امریکا سمیت دیگر ممالک سے تعلقات اور تجارت سمیت دیگر اہم موضوعات پر بحث کی جاتی ہے لیکن لی جے میونگ کے اس بیان کے بعد سب کی زبان پر صرف ایک ہی موضوع ہے اور وہ ہے گنج پن کا علاج، اس سے ظاہر ہوتا ہے جنوبی کوریا میں گنج پن قومی مسئلہ بن گیا ہے۔

صدارتی امیدوار نے ایک بیان میں کہا کہ ایک کروڑ سے زائد لوگوں کو بال گرنے کے مسائل کا سامنا ہے اور زیادہ تر لوگ دوسرے ممالک سے اس کا علاج کرواتے ہیں یا پھر دوائی منگواتے ہیں لہذا ہیئر ٹرانسپلانٹ کا علاج قومی ہیلتھ انشورنس پروگرام میں شامل کیا جانا چاہیے۔

لی جے میونگ کے اس بیان کے بعد لاکھوں کی تعداد میں لوگ ان کی سپورٹ میں سامنے آگئے اور سیکڑوں لوگوں نے ان کے اس موضوع کو سوشل میڈیا پر ٹرینڈ بناکر ان کے حق میں بیانات دیے۔

دوسری جانب اپوزیشن کی جانب سے صدارتی امیدوار کے اس بیان کو شدید تنقید کا نشانہ بنایا جارہا ہے اور اسے صرف لوگوں کی ہمدردیاں اور ووٹ حاصل کرنے کی ایک چال قرار دی جارہی ہے۔