ترجمان دفتر خارجہ عاصم افتخار احمد نے کہا ہے کہ پاکستان دہشت گردانہ حملوں کو فوری روکنے کا مطالبہ کرتا ہے۔

عاصم افتخار نے پاکستان کی متحدہ عرب امارات میں دہشت گردانہ حملے کی مذمت کرتے ہوئے کہا کہ پاکستان ابوظہبی میں حوثیوں کی طرف سے شہری علاقوں پر کیے گئے گھناؤنے دہشت گردانہ حملے کی شدید مذمت کرتا ہے۔

انہوں نے کہا کہ اس حملے میں ایک پاکستانی شہری سمیت متعدد افراد کی جانیں گئیں، ہم متاثرین کے اہل خانہ سے تعزیت کرتے ہیں اور زخمیوں کی جلد صحت یابی کی دعا کرتے ہیں۔

ترجمان دفتر خارجہ کا کہنا ہے کہ اس طرح کے حملے متحدہ عرب امارات کی خودمختاری اور علاقائی سالمیت کی خلاف ورزی ہیں، اس طرح کے حملے علاقائی امن و سلامتی کے لیے شدید خطرہ ہیں۔

عاصم افتخار نے مزید کہا کہ پاکستان متحدہ عرب امارات کے برادر عوام اور حکومت کے ساتھ دہشت گردی کی اس بے رحمانہ کارروائی کے خلاف یکجہتی کے ساتھ کھڑا ہے۔

واضح رہے کہ یمن کے حوثی باغیوں نے متحدہ عرب امارات کے دارالحکومت ابو ظہبی میں مختلف تنصیبات پر ممکنہ طور پر ڈرون حملے کئے۔

عرب ویب سائیٹ کے مطابق متحدہ عرب امارات کے دارالحکومت ابو ظہبی میں دو مقامات پر آگ لگنے کے مشتبہ واقعات ہوئے جو کہ ممکنہ طور پر ڈرون حملوں کا نتیجہ ہیں۔

ابو ظہبی پولیس کا کہنا تھاکہ ابو ظہبی کے صنعتی علاقے مصفاح میں آئل کمپنی کے 3 ٹرکوں اور ایئرپورٹ کی ایسی جگہ پر آگ لگی ہیں جہاں تعمیراتی کام ہورہے تھے۔

پولیس کا کہنا تھا کہ آگ لگنے کے مقامات سے چھوٹے طیارے کے پرزے ملے ہیں جو ممکنہ طور پر ڈرون یوسکتے ہیں، یہی ڈرونز یہاں ممکنہ طور پر دھماکوں اور آگ کا سبب بنے ہیں۔

پولیس نے کہا کہ آئل ٹینکرز میں آگ لگنے سے ایک پاکستان اور 2 بھارتی شہری جاں بحق جبکہ 6 افراد زخمی ہوئے تھے۔