سید اویس شاہ نے کہا ہے کہ مری واقعہ وزیر اعظم کے لاڈلے وزیر اعلیٰ کی نااہلی کا نتیجہ ہے۔

صوبائی وزیر ٹرانسپورٹ سید اویس شاہ نے کہا ہے کہ ساری رات لوگ مدد کے لیے چیختے رہے اس وقت ضلع اور صوبائی انتظامیہ کہاں تھی؟

انہوں نے کہا کہ سیاست نہیں کررہے ہیں ، ہمارے پاکستانی شہید ہوئے ہیں ، محکمہ موسمیات نے سب کچھ بتایا تھا تو کیوں انتظامات نہیں کئے۔

 سید اویس شاہ نے کہا ہے کہ ٹھیک ہے ، برف باری بہت زیادہ ہوئی ہے لیکن لوگوں کو محفوظ رکھنے کے لیے انتظامات کیوں نہیں کئے گئے ، اب وقت ہے سنبھل جائیں مزید موسم خرابی کی پیشگوئی ہے۔

اس کے علاوہ وزیر اعظم عمران خان نے سانحہ مری پر انکوئری کا حکم دے دیا ہے۔

دوسری جانب پاک فوج کے ترجمان کا کہنا ہے کہ ایف ڈبلیو او نے مری ایکسپریس وے ٹریفک کے لیے کھول دی ہے ، پاک فوج نے پھنسے ہوئے سیاحوں کے لیے مری میں 4ریلیف کیمپس قائم کردیے ہیں ، ریلیف کیمپس ملٹری کالج مری،جھیکا گلی،اے پی ایس کلڈنہ، اسٹیشن سپلائی ڈپو سنی بینک میں قائم کیے ہیں۔

آئی ایس پی آر کا کہنا ہے کہ سول انتظامیہ سے تعاون کے لیے تمام وسائل بروئے کار لائے جا رہے ہیں ، پاک فوج کے انجینیئرز اور مشینری مری ڈویژن انتظامیہ کی مدد کر رہی ہے۔

واضح رہے کہ مری میں گزشتہ روز برف کا طوفان آیا تھا، جس میں ہزاروں گاڑیاں پھنس گئی تھیں۔

مری میں اس وقت ایمرجنسی رضاکاروں اور امدادی کارکنوں کے علاوہ کسی کے بھی داخلے پر پابندی ہے۔پاک فوج کے دستے انتظامیہ کے ساتھ کر امدادی کاموں میں مصروف ہیں۔