طالبان کی جانب سے خواتین پر سفری پابندی لگانے کے بعد اب حمام خانوں کو بھی بند کرنے کا حکم دے دیا۔

غیر ملکی خبررساں ادارے کے مطابق طالبان کی جانب سے خواتین کے حمام خانوں پر پابندی سے متعلق حکم جاری کیا گیا ہے کہ افغانستان کے صوبے بلخ میں تمام حمام خانوں کو فوری طور پر بند کردیا جائے۔

افغان طالبان کی جانب سے جاری حکم نامے میں کہا کہ چونکہ لوگوں کو گھر پر جدید باتھ رومز کی سہولت میسر نہیں اس لیے مرد حضرات باہر حمام خانوں کا رخ کرسکتے ہیں البتہ خواتین کے لیے اس چیز کی اجازت نہیں اور انہیں صرف گھر پر نجی غسل خانے استعمال کرنا ہوں گے۔

یہ بھی پڑھیں؛ خواتین پر پابندی لگانے پر بھارتی اداکارہ کی طالبان کے زوال کی بددعا

 رپورٹ کے مطابق طالبان کی جانب سے صرف خواتین نہیں بلکہ چھوٹے بچوں پر بھی عام حمام خانوں میں جانے پر پابندی عائد کی گئی ہے اور اس کے علاوہ حمام خانوں میں خواتین کے باڈی مساج پر بھی سخت پابندی عائد کی گئی ہے جس کی خلاف ورزی کرنے والوں کو سخت سزا دی جائے گی۔

اس سے قبل افغان طالبان کی جانب سے خواتین پر سفری پابندی عائد کی گئی تھی جس کے تحت وہ اپنے کسی مرد رشتہ دار کے بغیر سفر نہیں کرسکتی ہیں۔

دوسری جانب سوشل میڈیا پر ایک ویڈیو وائرل ہورہی ہے جس میں افغان طالبان کی جانب سے کپڑوں کی دکانوں پر موجود خواتین کے مجسموں کے سر قلم کیے جارہے ہیں۔

یہ بھی پڑھیں؛ اندرون شہر مرد رشتے دار کے بغیر سفر کرنے پر پابندی

اس کے علاوہ طالبان کی جانب سے لڑکیوں کے حجاب کے بغیر اسکول جانے سمیت متعدد پابندیاں عائد کی گئی ہیں جس کے تحت وہ بغیر حجاب کے ٹی وی پر پروگرامز بھی نہیں کرسکتی اور نہ ہی کسی آفس میں کام کرسکتی ہیں۔