دنیا بھر کے عجائب گھروں اور شوقیہ حضرات کے پاس جتنے بھی شہابی پتھر (میٹیورائٹس) موجود ہیں ان کی دوتہائی تعداد براعظم انٹارکٹیکا سے ملی ہیں۔ لیکن اب مشین لرننگ، سیٹلائٹ ٹیکنالوجی اور مصنوعی ذہانت (آرٹیفشل انٹیلی جنس) کی مدد سے معلوم ہوا ہے کہ اسی برَاعظم کے حاشیوں پر تین لاکھ سے زائد انتہائی قیمتی شہابی ٹکڑے موجود ہوسکتےہیں۔

ہمارے نظامِ شمسی میں چھوٹے بڑے شہابی پتھر آوارہ گھومتے رہتے ہیں اور کبھی کبھار وہ زمین پر آکر تارہ ٹوٹنے کے انداز میں جل بھن کر راکھ ہوجاتے ہیں لیکن ان کی ایک یا دو فیصد تعداد زمین تک پہنچ جاتی ہے جسے جمع کرلیا جاتا ہے۔

تمام علاقوں کے مقابلے میں انٹارکٹیکا برف کی ایک چادر کی صورت میں پھیلا ہوا علاقہ ہے۔ یہاں گرنے والے سیاہ اور دیگر رنگوں کے آسمانی پتھر نظر میں آجاتے ہیں اور انہیں اٹھا لیا جاتا ہے۔ لیکن معمولی تاخیر سے وہ برف میں گم ہوجاتے ہیں اور برف کا گولہ انہیں لپیٹ میں لے لیتا ہے۔ لیکن ٹھہرئیے کہ اب بھی کچھ نہیں بگڑا کیونکہ ماہرین نے اس کی حرکات کو نوٹ کرلیا ہے۔

فری یونیورسٹی آف برسلز کی ڈاکٹر ویرونیکا ٹولینیر نے بتایا کہ خاص فطری طریقے سے یہ پتھربرف کی حرکات اور ہوا کے دوش پر انٹارکٹیکا براعظم کے کناروں پر جاکر یا تو سمندر میں گرتے ہیں یا وہاں ٹھہرجاتےہیں۔ اب مشین لرننگ اور سیٹلائٹ تصاویر سے ان درجنوں جگہوں کی نشاندی کی گئی ہے جہاں یہ پتھر موجود ہوسکتےہیں۔

لیکن اس بات کی ماضی کے تجربات سے تصدیق بھی ہوسکتی ہے۔ یعنی اینٹارکٹیکا پر جتنے بھی غیر ارضی پتھر ملے ہیں وہ انہی مقامات پر ملے ہیں ۔ اس سے نظریئے کی تصدیق ہوتی ہے کہ شہابی پتھر آخرکار جمع ہوکر کناروں پر رک جاتے ہیں۔

اب ڈاکٹر ویرونیکا نے کہا ہے کہ اگلے مرحلے میں ڈرون اور دیگر طریقوں سے ان مقامات پر شہابیوں کو تلاش کیا جائے گا۔