چیف جسٹس آف پاکستان جسٹس گلزار احمد کے ممکنہ دورے سے قبل سندھ حکومت میں تھرتھلی مچ گئے۔ صوبائی وزیروں اور مشیروں کی دوڑیں لگ گئیں۔

حکومتی وزیر اور مشیر ہنگامی بنیادوں پر سندھ کے سب سے تباہ حال اور برباد علاقے تھر پہنچ گئے۔

صوبائی وزیرِ بلدیات ناصر حسین شاہ، صوبائی وزیر ایکسائز و ٹیکسیشن مکیش چاولہ، مشیر برائے کھیل ارباب لطف اللہ و دیگر مٹھی پہنچ گئے۔

ناصر شاہ اور رکن قومی اسمبلی مہیش ملانی نے سول ہسپتال مٹھی کا دورہ کیا جہاں مختلف وارڈز اور این آئی سی وی ڈی وارڈز کا جائزہ لیا۔

اس موقعے پر ناصڑ حسین نے دعویٰ کیا کہ سول ہسپتال مٹھی میں جو سہولیات موجود ہیں وہ پورے پاکستان کی کسی بھی ہسپتال میں نہیں ہیں۔

انہوں نے کہا کہ اس وقت سول ہسپتال مٹھی میں 70 سے زائد اسپیشلسٹ ڈاکٹرز موجود ہیں۔

ان کا مزید کہنا تھا کہ بلاول بھٹو زرداری اور وزیرِ اعلیٰ سندھ کی ہدایات پر صحت اور تھر میں بند آر او پلانٹ کا معائنہ کرنے کے لیے تھر آئے ہیں۔

صوبائی وزیر ناصر شاہ کا کہنا تھا کہ محکمہ صحت میں کسی بھی ڈاکٹر یا عملے کی کوتاہی پر ان کے خلاف ایکشن لیا جائے گا۔

میڈیا سے گفتگو میں ان کا مزید کہنا تھا کہ جو آر او پلانٹ ملازمین تنخواہوں کے لیے احتجاج کر رہے ہیں، اس معاملے پر ایک سینئر آفیسر پر کمیٹی تشکیل دیں گے، ملازمین کو جلد تنخواہیں دیں گے۔