اسپیکر پنجاب اسمبلی چوہدری پرویز الٰہی نے کہا ہے کہ مری سانحہ پر پوری قوم سوگوار ہے۔

چوہدری پرویز الٰہی نے مسلم لیگی رہنما تلہ گنگ حاجی کرم حسین سے ٹیلی فونک رابطہ کیا اور حاجی کرم حسین سے ان کے بھانجے اے ایس آئی محمد نوید اور ان کے 6 بچوں کی مری سانحہ میں اموات پر اظہار تعزیت کیا۔

ان کا کہنا تھا کہ اے ایس آئی محمد نوید اور ان کے 6 بچوں کی ناگہانی موت پر گہرا دکھ ہوا ہے، مری سانحہ پر پوری قوم سوگوار ہے، ہم آپ کے دکھ میں برابر کے شریک ہیں۔

 اسپیکر پنجاب اسمبلی چوہدری پرویز الٰہی کا مزید کہنا تھا کہ اللہ تعالیٰ مرحومین کی مغفرت فرمائے اور آپ سب کو صبر عطا فرمائے۔

  واضح رہے کہ مری میں گزشتہ روز برف کا طوفان آیا تھا، جس میں ہزاروں گاڑیاں پھنس گئی تھیں، برفباری کے باعث مختلف گاڑیوں میں 21 افراد دم گھٹ کر جاں بحق ہوگئے ہیں جبکہ پاک فوج کے دستے امدادی کارروائیوں میں مصروف ہیں۔

مری اور گلیات میں گزشتہ چند روز سے برفباری کا سلسلہ جاری ہے، گزشتہ روز عوام کی بڑی تعداد برفباری سے لطف اندوز ہونے کے لئے پہنچی تھی۔

شدید برفباری میں ٹریفک جام ہونے کے بعد بڑی تعداد اپنی گاڑیوں میں ہی محصور ہوکر رہ گئی تھی۔ ان ہی میں وہ بدقسمت افراد بھی شامل تھے جو اپنی گاڑیوں میں دم گھٹنے سے زندگی کی بازی ہار گئے۔

مری میں اس وقت ایمرجنسی رضاکاروں اور امدادی کارکنوں کے علاوہ کسی کے بھی داخلے پر پابندی ہے۔ پاک فوج کے دستے انتظامیہ کے ساتھ کر امدادی کاموں میں مصروف ہیں۔

خیال رہے کہ سانحہ مری میں جاں بحق ہونے والوں میں کری روڈ کے رہائشی شہزاد اسماعیل، اہلیہ و چار بچوں کی نماز جنازہ ادا کر دی گئی ہے۔

جاں بحق ہونے والوں میں گھر کا سربراہ 46  سالہ شہزاد اسماعیل ، 35 سالہ صائمہ شہزاد، 10 سالہ سمیع الله شہزاد، 8 سالہ حبیب الله شہزاد، 7 سالہ عائشہ شہزاد اور 5 سالہ  اقرا شہزاد شامل ہیں۔

 نماز جنازہ میں سیاسی سماجی شخصیات، عزیز اقارب و اہلیان نے بڑی تعداد میں شرکت کی۔