سری لنکا کو اس وقت شدید مالی بحران کا سامنا ہے اور ملک تقریباً دیوالیہ ہونے کے قریب ہے جس کی وجہ سے مہنگائی عروج پر ہے اور ان سب کا فائدہ آٹو ڈیلرز بھرپور طریقے سے اٹھارہے ہیں۔

سری لنکا میں حکومت کی جانب سے غیر ضروری درآمدات پر پابندی کے سبب پرانی یا تھوڑی استعمال شدہ گاڑیاں بیچنے والوں کی چاندی ہوگئی ہے اور وہ ایک پرانی گاڑی کی قیمت اس وقت ایک اچھے اور نئے مکان سے بھی زیادہ ہوگئی ہے۔

سری لنکا میں پابندی کے سبب نئی گاڑیوں کی پیداوار رک گئی ہے اور لوگ نہ صرف پرانی گاڑیاں خریدنے پر مجبور ہیں بلکہ وہ ان گاڑیوں کی زیادہ قیمت دینے بھی پریشان ہیں جب کہ یہ پرانی گاڑیوں کی قیمت بھی مڈل کلاس کی پہنچ سے باہر ہوگئی ہے۔

رپورٹ کے مطابق سری لنکا کے ایک شہر میں ایک پرانی گاڑی (جس کا انجن کسی اور ملک والے کبھی استعمال نہ کریں)، 8 ہزار 250 امریکی ڈالر میں فروخت ہورہی ہے جو سری لنکا میں ایک عام آدمی کی سالانہ آمدنی سے بھی زیادہ ہے۔

سری لنکا کے ایک آٹو ڈیلرز نے بتایا کہ گاڑی اور گھر دونوں ہی کامیابی کی علامت سمجھے جاتے ہیں اور لوگ گاڑیوں کی دگنی قیمت ہونے کے باوجود خریدنے کے لیے تیار ہیں۔

 واضح رہے کورونا کی عالمی وبا نے سری لنکا کی معیشت کو شدید نقصان پہنچایا ہے اور اس کی سیاحت سمیت دیگر آمدن کے ذرائع تقریباً ختم ہوچکے ہیں جس کے باعث حکومت کی جانب سے گزشتہ سال نئی گاڑیوں سمیت مختلف چیزوں کی درآمد پر پابندی عائد کررکھی ہے۔