اسپیکر قومی اسمبلی اسد قیصر نے کہا ہے کہ پاکستان اہل کشمیر کی حق خود ارادیت کیلئے پرامن جدوجہد کی قدر کرتا ہے۔

سماجی رابطے کی ویب سائٹ ٹوئٹر پر اپنے جاری کردہ ٹوئٹ پیغام میں اسد قیصر نے کشمیریوں کے یوم حق خود ارادیت پر پیغام دیتے ہوئے کہا کہ یوم حق خود ارادیت کشمیر اقوام متحدہ کو کشمیر سے متعلق اپنے وعدوں کی یاد دہانی کا دن ہے۔

یوم حق خود ارادیت کشمیر اقوام متحدہ کو کشمیر سے متعلق اپنے وعدوں کی یاد دہانی کا دن ہے۔پاکستان اہل کشمیر کی حق خود ارادیت کیلئے پرامن جدوجہد کی قدرکرتا ہے۔اقوام متحدہ اور عالمی برادری سے مطالبہ ہےکہ وہ مقبوضہ کشمیر میں جاری انسانیت سوزمظالم کو رکوانے میں اپنا بھرپورکردار ادا کرے۔

— Asad Qaiser (@AsadQaiserPTI) January 5, 2022

انہوں نے کہا کہ اقوام متحدہ اور عالمی برادری سے مطالبہ ہے کہ وہ مقبوضہ کشمیر میں جاری انسانیت سوز مظالم کو رکوانے میں اپنا بھرپور کردار ادا کرے۔

واضح رہے کہ مقبوضہ کشمیر سمیت دنیا بھر میں آباد کشمیری شہری آج یوم حق خود ارادیت منارہے ہیں۔

اقوام متحدہ کی سلامتی کونسل نے 1949 میں آج ہی کے روز قرارداد منظور کی تھی جس کے مطابق کشمیریوں کو یہ حق دیا گیا تھا کہ وہ اپنی مرضی کے مطابق اپنے مستقبل کا فیصلہ کرسکتے ہیں۔

آج کا دن ماننے کا مقصد اس عزم کا اعادہ کرنا ہے کہ مقبوضہ وادی کے بھارتی تسلط سے چھٹکارے تک کشمیری عوام اپنی جدو جہد جاری رکھیں گے۔

مقبوضہ کشمیر میں یوم حق خود ارادیت کے موقع پر عوامی احتجاج کو کچلنے کے لیے اہم شہروں اور قصبات قابض بھارتی فوج کی اضافی نفری تعینات کی گئی ہے۔

دوسری جانب یوم حق خود ارادیت کی مناسبت سے آزاد کشمیر سمیت دنیا بھر میں گزشتہ 74 برسوں سے جاری ظلم و بربریت اور مسئلہ کشمیر کو اجاگر کرنے کے لیے مذاکرے، مباحثے، سیمینارز اور دیگر تقریبات کا اہتمام کیا جارہا ہے۔