حسان خاور نے کہا ہے کہ اس قوم کے مجرموں کے لیے کوئی ڈیل اور ڈھیل نہیں انھیں سزا ملے گی۔ اپوزیشن نہ ہی پارلیمینٹ میں کچھ کرسکتی ہے اور نہ ہی باہر۔ 

ترجمان پنجاب حکومت حسان خاور نے لاہور میں میڈیا سے گفتگو کرتے ہوئے کہا کہ روڈا کے معاملے پر ہم سپریم کورٹ جائیں گے کیونکہ یہ ہمارا حق ہے۔ یہ وہ پراجیکٹ ہے جس سے لاہور شہر دوبارہ زندہ ہوجائے گا۔ جب ہائیکورٹ کا فیصلہ آیا تو اس فیصلے میں جس کے قانون کے تحت ہم نے کام کیا اس کی شقوں کو کالعدم قرار دیا ہے۔

انھوں نے کہا کہ ہم یہاں مزید نو ڈبل ڈیکر بسوں کو لارہے ہیں اور یہ جلد پورے پنجاب میں چلیں گی۔ ہم یہاں بیس سے زائد ریسٹ ہاوسز کو ٹوورزم ڈیپارٹمنٹ کے ساتھ ملا رہے ہیں جن سے سیاحوں کو فائدہ پہنچایا جائے گا۔ ڈبل ڈیکر بسیں سیاحوں کو لاہور کے تاریخی مقامات کی سیر کے لیے بہت اہم ہیں۔ہمیں بہت خیال رکھنا ہے کہ معاشرے کا ہر طبقہ ہمارے ساتھ چلے۔

ترجمان پنجاب حکومت نے کہا کہ مینٹل ہیلتھ مریضوں کے لیے ڈبل ڈیکر بسوں کا سفر بالکل فری کیا جا رہا ہے۔ ہم ہفتے میں ایک بار ان بسوں پر مینٹل ہیلتھ مریضوں کو فری سیر کروائیں گے۔ وزیر اعلی پنجاب کی ہدایت پر ہم ہر طبقے کے لوگوں کے لیے خاص کام کررہے ہیں۔ مینٹل ہیلتھ کے مریض وہ ہیں جن کو ان کے گھر والے چھوڑ جاتے ہیں۔ ان دماغی مریضوں کو یہ احساس دلانا ہے کہ ہم ان کی فیملی ہیں۔

حسان خاور نے کہا کہ وہ معاشرہ کبھی ترقی نہیں کرتا جو مسائل کو دیکھ کر آنکھیں بند کرلے۔ قصور سے لاہور تک آ کر دیکھ لیں کوئی جگہ ایسی نظر نہیں آئے گی جہاں لوگ نہ رہ رہے ہوں۔ اب جہاں بھی جاؤ وہاں ٹریفک کے مسائل کا سامنا ہے۔ لاہور کو مینج کرنے کے لیے ہمیں پلاننگ کرنا بہت ضروری ہے۔ اس وقت ضروری ہے کہ ایسا ماسٹر پلان کیا جائے جس سے لاہور کے بے ہنگم پھیلاؤ کو روکا جا سکے۔

انھوں نے میڈیا سے گفتگو میں مذید کہا کہ ہم اس سال جشن بہاراں بھی بہت دھوم دھام سے منائیں گے۔ بسنت نہیں منا سکتے لیکن ان تہواروں کو زندہ رکھنا ہے۔