ون ڈے ٹیم آف دی ایئر میں کسی بھارتی کھلاڑی کو شامل نہیں کیا گیا تاہم اس ٹیم میں 3 پاکستانی کھلاڑیوں کی انٹری ہوئی ہے۔

ای ایس پی این کرک انفو کی جانب سے وائٹ بال ٹیم آف دی ایئر کا اعلان کیا گیا ہے جس میں ون ڈے اور ٹی ٹوئنٹی ٹیم کی قیادت  قومی ٹیم کے کپتان بابراعظم کریں گے اس کے علاوہ  فخرزمان اور شاہین آفریدی ایک روزہ ٹیم میں شامل ہیں جب کہ ٹی ٹوئنٹی میں بابراعظم کے ساتھ محمد رضوان اور شاہین آفریدی کو ڈالا گیا ہے۔

کرک انفو کی جانب سے ون ڈے ٹیم آف دی ایئر میں 2 پاکستانی، آئرلینڈ اور بنگلادیش کے 3،3 کھلاڑی جب کہ سری لنکا کے 2 اور جنوبی افریقا کا ایک کھلاڑی شامل ہے۔

دوسری جانب ٹی ٹوئنٹی ٹیم میں 3 پاکستانی اور 2 انگلینڈ کے کھلاڑی شامل ہیں جب کہ دیگر کھلاڑیوں میں بھارت، افغانستان، بنگلادیش، آسٹریلیا، سری لنکا، نیوزی لینڈ کا ایک ایک کھلاڑی شامل ہے۔

ون ڈے ٹیم

ون ڈے ٹیم کی کپتانی کے فرائض پاکستان کے بابراعظم کو دی گئی ہے اور فخرزمان کو بطور اوپنر ٹیم میں رکھا گیا ہے۔

اوپننگ میں فخرزمان کا ساتھ آئرلینڈ کے پال اسٹرلنگ دیں گے اور ون ڈاؤن پوزیشن پر بابراعظم موجود ہوں گے جب کہ چوتھے نمبر پر بیٹنگ کے لیے جنوبی افریقا کے راسی وین ڈار ڈاسن موجود ہوں گے۔

بنگلادیش کے شکیب الحسن کو بطور آل راؤنڈر پانچویں نمبر پر رکھا گیا ہے اور بنگلادیش کے ہی مشفق الرحیم چھٹے نمبر پر آئیں گے اور وکٹ کیپنگ کے فرائض انجام دیں گے۔

آئرلینڈ کے بولنگ آل راؤنڈر سیمی سنگھ اور سری لنکا کے وانندو ہسارانگا کو اسپنرز کے طور پر ٹیم میں رکھا گیا ہے جب کہ فاسٹ بولنگ کا شعبہ آئرلینڈ کے جوش لٹل ، سری لنکا کے داشماتھا چمیرا اور بنگلادیش مستفیض الرحمان کو دیا گیا ہے۔

ٹی ٹوئنٹی ٹیم

مختصر فارمیٹ کی قیادت بھی قومی ٹیم کی کپتان بابراعظم کریں گے جن کے ساتھ اوپننگ اور وکٹ کیپنگ کے فرائض محمد رضوان انجام دیں گے۔

ون ڈاؤن پوزیشن پر انگلش آل راؤنڈر معین علی موجود ہیں اور چوتھے نمبر پر آسٹریلیا کے جارح مزاج بلے باز گلین میکسوئل ہوں گے اور پانچویں نمبر پر ایک بار پھر سے لیام لونگ اسٹوں کی صورت میں جارح مزاج بلے باز موجود ہیں جن کا تعلق انگلینڈ سے ہے۔

نیوزی لینڈ کے گلین فلپس چھٹے نمبر پر بیٹنگ کی ذمہ داری سنبھالیں گے  جب کہ اسپنرز کا شعبہ دنیا کے بہترین اسپنر افغانستان کے راشد خان اور سری لنکا کے وانندو ہسارانگا سنبھالیں گے۔

فاسٹ بولنگ کے لیے پاکستان کے شاہین آفریدی ، بنگلادیش کے مستفیض الرحمان اور بھارت کے ہرشل پٹیل شامل ہیں۔