راجہ بشارت نے انار کلی دھماکے میں جانی و مالی نقصان پر اظہار افسوس کیا ہے۔

وزیر قانون پنجاب راجہ بشارت نے انارکلی دھماکے میں جانی و مالی نقصان پر اظہار افسوس کیا اور آئی جی پنجاب پولیس سے واقعے کی ابتدائی رپورٹ طلب کرلی۔

انہوں نے کہا کہ تحقیقات کے دوران تمام پہلوؤں کو مد نظر رکھا جائے۔

وزیر  قانون نے مصروف مارکیٹوں میں پولیس سیکیورٹی بڑھانے کی بھی ہدایت دی ہے۔

راجہ بشارت نے متاثرہ خاندانوں کے ساتھ اظہار ہمدردی کیا اور زخمیوں کی جلد صحتیابی کی دعا کی۔

واضح رہے کہ لاہور کے علاقے نیو انار کلی پان منڈی میں دھماکے سے 3 افراد جاں بحق جبکہ 20 زخمی ہوگئے ہیں۔

لاہور کے علاقے نیو انار کلی بازار کی پان منڈی میں عین اس وقت دھماکا ہوا جب لوگوں کی بڑی تعداد وہاں موجود تھی۔

دھماکا اس قدر شدید تھا کہ اس سے 6 موٹر سائیکلیں اور اردگرد کی دکانیں تباہ جب کہ گاڑیوں میں بھی آگ لگ گئی۔

دھماکے کے زخمیوں کو فوری طور پر قریبی اسپتال منتقل کردیا گیا۔

طبی عملے نے 3 افراد کے جاں بحق ہونے کی تصدیق کردی ہے جب کہ 20  زخمیوں کو طبی امداد فراہم کی جارہی ہے۔

سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے جب کہ پولیس کی خصوصی ٹیمیں شواہد اکٹھا کر رہی ہیں۔

ڈی آئی جی آپریشنز کا کہنا ہے کہ ابتدائی شواہد سے ایسا لگتا ہے کہ دھماکے میں موٹرسائیکل استعمال کی گئی ہے۔