فنانس ایکٹ ترمیمی بل کی منظوری کے معاملے پر حکومت نے دس جنوری کو قومی اسمبلی اجلاس بلانے کا فیصلہ کرلیا ہے۔ 

تفصیلات کے مطابق وزیراعظم کے مشیر برائے پارلیمانی امورڈاکٹر بابراعوان نے کہا ہے کہ قومی اسمبلی کا اجلاس دس جنوری کی شام چار بجے بلانے کی سمری بھجوا دی ہے۔ قومی اسمبلی اجلاس میں فنانس ایکٹ ترمیمی بل پیش کیا جائیگا۔

ڈاکتڑ بابراعوان کا کہنا ہے کہ اجلاس میں سینیٹ کی فنانس ایکٹ ترمیمی بل پرتجاویز کو زیرغور لایا جائے گا۔ حکومت قوم اورعام آدمی کی بہتری کے لئے قانون سازی کا عمل رکنے نہیں دے گی۔

وزیراعظم کےمشیر برائے پارلیمانی امورنے کہا کہ اپوزیشن کو دعوت ہے کہ وہ قانون سازی میں عملی طور پر حصہ لے۔ ایوان میں نعرے بازی سے اپوزیشن قانون نہیں بنا سکتی۔

ڈاکٹر بابر اعوان نے مذید کہا کہ قانون سازی اپوزیشن کے ہنگامہ آرائی سے نہیں رکنے دیں گے۔ قانون سازی پر مذاکرات کے لیے دروازے کھلے ہیں۔

گذشتہ دنوں قومی اسمبلی کا اجلاس اسپیکر اسد قیصر کی سربراہی میں شروع ہوا جس میں حکومت نے منی بجٹ قومی اسمبلی میں پیش کیا ہے۔  اس دوران  اپوزیشن کی جانب سے شدید احتجاج کیا گیا۔

ڈاکٹر بابر اعوان کی جانب سے پیش کردہ قرارداد منظور ہونے کے بعد وزیر خزانہ شوکت ترین نے فنانس سپلیمینٹری بل 2021 (منی بجٹ) پیش کیا  جس پر  اسپیکر اسد قیصر نے رولنگ دی کہ اسمبلی کے قواعد و ضوابط کے تحت فنانس سپلیمینٹری بل قومی اسمبلی کی فنانس کمیٹی کو نہیں بھجوایا جائے گا۔