وزیراعلی بلوچستان میر عبدالقدوس بزنجو کا کہنا ہے کہ بارشوں کے دوران شہریوں کو درپیش مشکلات کا فوری حل حکومتی اداروں کی زمے داری ہے۔

تفصیلات کے مطابق وزیراعلی بلوچستان میر عبدالقدوس بزنجو نے کوئٹہ میں بارش سے پیدا ہونے والی صورتحال پر عوامی شکایات کا نوٹس لے لیا ہے۔

وزیراعلی بلوچستان نے ایڈمنسٹریٹر کیو ایم سی واسا اور کمشنر کوئٹہ کو نکاسی آب کے لیے جنگی بنیادوں پر اقدامات کی ہدایت دیتے ہوئے کہا کہ شہریوں کو درپیش مشکلات و مسائل کا فوری حل حکومتی اداروں کی زمے داری ہے۔

میر عبدالقدوس بزنجو کا کہنا تھا کہ صفائی کا عملہ ضروری مشنری متاثرہ علاقوں میں پہنچا کر کام کا آغاز کرے،  متاثرہ علاقوں سے نکاسی آب اور صفائی کرکے ویڈیو اور تصاویر انہیں بھجوائی جائیں۔

وزیراعلی بلوچستان میر عبدالقدوس بزنجو نے کہا کہ کیو ایم سی اور واسا کا عملہ پوری طرح الرٹ رہتے ہوئے شہریوں کی مدد کرے۔

انہوں نے کہا کہ نکاسی آب اور صفائی کے اقدامات میں کوئی کوتاہی برداشت نہیں کی جائے گی۔

واضح رہے کہ بلوچستان سمیت ملک کے دیگر شہروں میں بھی بارشوں کا سلسلہ شروع ہوچکا ہے۔

 محکمہ موسمیات کے ڈائیریکٹر سردار سرفراز کے مطابق کراچی میں گرج چمک کے ساتھ درمیانی اور کہیں تیز بارش کا امکان ہے، 4 جنوری (آج) سے شہر میں سسٹم کے تحت بوندا باندی بھی ہوسکتی ہے۔

ڈی جی میٹ سردارسرفراز نے بتایاکہ سسٹم ملک کے شمالی علاقوں میں بھی بارش کا باعث بن سکتا ہے،کراچی میں 3 جنوری سے سرد ہوائیں مسلسل چل رہی ہیں۔

کراچی میں 4 اور 6 جنوری کو موسم سرما کی دوسری بارش کا امکان ہے۔