بحرالکاہل میں چند روز قبل سونامی کا سامنا کرنے والے ملک ٹونگا کے سمندر میں انٹرنیٹ کیبلز کی بحالی میں مزید چار ہفتے لگ سکتے ہیں۔

ہفتے کے روز درجنوں جزائر پر مشتمل ٹونگا میں زیر سمندر موجود آتش فشاں کے پھٹنے سے بڑے پیمانے پر تباہی آئی تھی، سونامی سے زیر سمندر انٹرنیٹ کی کیبلز بھی متاثر ہوئیں تھی۔

نیوزی لینڈ کے وزارت خارجہ کے ترجمان کا کہنا ہے کہ کیبلز کی بحالی میں چار ہفتے لگ سکتے ہیں۔

انٹرنیٹ کیبلز کی خرابی سے ٹونگا کا رابطہ بیرونی دنیا سے ہفتے سے منقطع ہے۔

ترجمان کا کہنا ہے کہ ٹیم چوبیس گھنٹے کام کر رہی ہے اور متبادل ذرائع سے سروس کی فراہمی کی کوشش کی جارہی ہے۔

امریکی کیبل کمپنی سب کام کا کہنا ہے کیبلز کی مرمت کے کام میں وقت لگے گا، سب کام کو 50 ہزرا کلومیٹر کیبلز کی مرمت کا تجربہ ہے۔ ٹیلی کمیونیکیشن کمپنی نے ٹونگا کیبلز کی بحالی کے لئے بحری جہاز کو روانہ کر دیا ہے۔

سب کام کمپنی کا کہنا ہے کہ زیر زمین آتش فشاں کے پھٹنے سے انٹرنیٹ کیبلز دو جگہ سے متاثر ہوئی ہے۔

ٹونگا میں کچھ غیر ملکی سفارتکاروں کے پاس سیٹیلائٹ موبائلز ہیں جو دارالحکومت میں ہیں۔ جبکہ متعدد ٹونگا شہری بیرونی دنیا سے اپنے پیاروں سے رابطہ کرنے کی کوشش کر رہے ہیں۔

ٹیلی کمیونیکیشن کمپنی ڈجی سیل نے کہا ہے کہ وقتی طور پر ملک میں 2 جی کنکشن بحال کر دیا جائے گا تاکہ شہری اپنے پیاروں کو میسجز اور وائس میسجز کر کے خیریت دریافت کر سکیں۔