کرپٹو کرنسی انفلوئنسر اور ٹیکنالوجی موومنٹ کے سربراہ وقار ذکا نے وفاقی حکومت پر ہراساں کئے جانے کا الزام عائد کیا ہے۔

وقار ذکا کا کہنا ہے کہ حکومت کرپٹو کرنسی کو قانونی تحفظ دینے سے متعلق کیس واپس لینے کے لیے ان پر دباؤ ڈال رہی ہے۔

وقار ذکا نے اپنے ایک طویل ویڈیو پیغام میں الزام عائد کیا کہ انہیں ایک فون کال موصول ہوئی جس میں ان سے مطالبہ کیا گیا کہ وہ سندھ ہائیکورٹ میں زیرِ سماعت کیس کی پیروی چھوڑ دیں یا پیشی پر جائیں تو دلائل دینے سے گریز کریں۔

ویڈیو بیان کے مطابق وقار ذکا نے جب فون کرنے والے سے پوچھا کہ کیا آپ حکومت کے نمائندے ہیں تو جواب ملا کہ نہیں وہ مداح ہیں۔

یہ بھی پڑھیں: اسٹیٹ بینک نے کرپٹوکرنسی پر مکمل پابندی کی سفارش کردی

کالر نے ان سے مزید کہا کہ وقار ذکا، آپ بہت عرصے سے باہر گھومنے نہیں گئے، اگر آپ کا نام ای سی ایل میں ڈال دیا جائے تو کیسا لگے گا؟ کیسا لگے گا اگر آپ پر منی لانڈرنگ اور ٹیرر فائنینسنگ کے مقدمات بنائے جائیں، اور آپ کے بینک اکاؤنٹس اور کریڈٹ کارڈ بند کر دیے جائیں؟

وقار ذکا نے جواب میں کہا کہ میں نے کوئی غلط کام نہیں کیا، فیس بک کے ذریعے میں جو پیسہ کما رہا ہوں وہ قانونی طریقے سے بینک کے ذریعے پاکستان لارہا ہوں، میں یہ پیسہ کسی اور ملک میں بھی قانونی طریقے سے اتار سکتا ہوں لیکن میں ترسیلات زر پاکستان لانا چاہتا ہوں۔

انہوں نے کہا کہ میں نے ایف بی آر کو بہت سارے سیاست دانوں سے زیادہ ٹیکس دیا ہے۔

وقار کا کہنا تھا کہ جب میں نے نامعلوم کالر کو کہا کہ میں اپنا ڈکلیئرڈ پیسہ پاکستان لا رہا ہوں، میری کوئی مشکوک سرگرمی  ہے تو مجھے بتا دیا جائے۔

انہوں نے استفسار کیا کہ کسی نوٹس، ٹریک ریکارڈ اور مشکوک سرگرمی کے بغیر میرے خلاف کارروائی کیسے ہوسکتی ہے؟

فون کرنے والے نے انہیں کہا کہ وقار ذکا صاحب جب تکلیفیں ملنا شروع ہوں گی تو ملک و قوم سے کوئی بچانے نہیں آئے گا، آپ براہِ کرم حکومت کے خلاف نہ بولیں، حکومت چاہتی ہے کہ ملک میں کرپٹو کرنسی نہ آئے، لہٰذا آپ کیس واپس لے لیں۔

اس موقع پر وقار ذکا نے اب اعلان کیا ہے کہ وہ قانونی جنگ ضرور لڑیں گے اور ہر صورت عدالت جائیں گے۔

انہوں نے امید کا اظہار کیا کہ سندھ ہائیکورٹ ان کے حق میں ضرور فیصلہ دے گی۔

وقار ذکا کا کہنا ہے کہ سارے دروازے بند بھی ہوگئے تو وہ ٹیکنالوجی موومنٹ کے چاہنے والوں کو ڈی چوک پر دھرنا دینے کی کال دیں گے۔

اپنی طویل ویڈیو میں وقار ذکا نے بتایا کہ کرپٹو پر پابندی لگانے کے خواہش مند یہ نہیں سوچ رہے کہ کرپٹو کرنسی پر پابندی سے میٹاورس میں ملازمتوں کے مواقع چلے جائیں گے۔

انہوں نے کہا کہ میٹا ورس پر ورچوئل لینڈ بیچنے کے جو بروکریج ہاؤس کھلنے ہیں ان کی نوکریاں ختم ہوجائیں گی۔

وقار ذکا کے مطابق بلاک چین میں ڈیولپمنٹ کے لیے کرپٹو چاہیے ہوتی ہے وہ  ٹیسٹنگ نہیں ہوسکے گی اور جامعات اس حوالے سے نہیں پڑھا سکیں گی۔ این ایف ٹی(نان فنجیبل ٹوکن) جس کے ذریعے کوئی آرٹسٹ آن لائن اپنا آرٹ ورک بیچ سکتا ہے کرپٹو کرنسی پر پابندی سے یہ سب محروم ہوجائیں گے۔

Govt is forcing to ban Cryptocurrency , if not , sir @ImranKhanPTI please tweet what is your take on this ban ? As #YouthWantsCrypto , Today is the court case hearing , we want to know Prime minister’s opinion

— Waqar Zaka (@ZakaWaqar) January 11, 2022

وقار ذکار نے ایک اور ٹوئٹ  میں لکھا کہ حکومت کرپٹو کرنسی پر پابندی کے لیے دباؤ ڈال رہی ہے۔ عمران خان صاحب  اگر ایسا نہیں ہے تو آپ  ٹوئٹ کے ذریعے اس معاملے پر اپنی رائے کا اظہار کریں۔