قائد ایوانِ بالا ڈاکٹر شہزاد وسیم کا سانحہ مری پر کہنا ہے کہ جس نے بھی غفلت کی اس کو سزا ملے گی۔

سینیٹ اجلاس سے خطاب میں سینیٹر شہزاد وسیم نے کہا کہ سانحہ مری پر تعزیت کرتے ہیں، ایک حقیقت ہے کہ پوری دنیا میں قدرتی آفات آتی ہیں۔

قائد ایوانِ بالا نے اپنے خیالات کا اظہار کرتے ہوئے کہا کہ جب بھی برف باری ہوتی ہے لوگ لطف اندوز ہونے کے لئے جاتے ہیں، لیکن یہ برفباری عام نہیں بلکہ شدید ترین طوفان تھا، جس کے باعث مسائل نے جنم لیا۔

سینیٹر شہزاد وسیم نے کہا کہ طوفانی برفباری کے باعث ریسکیو اور ریلیف میں مسائل کا سامنا رہا، مری میں برف باری طوفانی برف بن کر آئی جس سے کئی مسائل پیدا ہوئے۔

قائدِ سینیٹ نے مزید کہا کہ آج امریکہ دنیا کا جدید ترین ملک ہے، ورجینیا میں اسی قسم کا طوفان آیا تو ایک شاہراہ چوبیس گھنٹے بند رہی، امریکہ جسیے جدید ملک میں برفانی طوفان سے شاہراہ کھولنے میں چوبیس گھنٹے لگے۔

ان کا مزید کہنا تھا کہ جب مری میں برفانی طوفان ہوا، آپریشن کرنا ممکن نہیں تھا، اس کے باجود ریلیف کام ہوا، راستے کھولے گئے لوگوں کی داد رسی کی گئی۔

ڈاکٹر شہزاد نے کہا کہ حکومت اپنی ذمہ داری کا احساس رکھتی ہے، واقعے کے لیے بنائی گئی کمیٹی اپنا کام ذمہ داری سے کرے گی۔