جہاں ملک بھر میں کورونا کے وار تیزی سے جاری ہیں وہیں ڈینگی اور ملیریا بھی تیزی سے پھیل رہا ہے۔

 جبکہ بارش کے موسم میں مچھروں کی افزائش کے امکانات بھی بڑھ جاتے ہیں۔

ایسے میں گھر سے مچھر کیسے بھگائیں؟ اس کے چند گھریلو ٹوٹکے آج ہم آپ کو بتائیں گے۔

گھر سے باہر اور اندر مچھروں سے خود کو کیسے محفوظ رکھا جا سکتا ہے اس کے لئے چند جڑی بوٹیوں اور گھریلو نسخوں کا استعمال بتائیں گے۔

مچھروں کو بھگانے کے لئے جڑی بوٹیوں کا استعمال

جڑی بوٹیوں کے استعمال سے ہمیں کئی قسم کے مسائل کا حل ملتا ہے انہیں میں مچھروں سے نجات بھی شامل ہے، تلسی کے پتے مچھر دور بھگانے کے لئے بہترین ہیں۔

تلسی کے پتے کھڑکیوں اور گھر کے داخلی راستوں پر رکھ دیں  اس کے علاوہ بالکونی میں رکھ دیں تو اس کے بعد باہر سے مچھر گھر میں داخل نہیں ہوں گے۔

اسی طرح پودینہ بھی ایک تیز خوشبودار پودا ہے جس کی خوشبو تیزی سے ہوا میں پھیلتی ہے۔

پودینے کے سبز یا خشک پتوں کو ٹی بیگز کی طرح کاغذی تھیلیوں میں رکھ کر کھڑکیوں اور داخلی دروازوں پر لٹکا دیں تو مچھر نہیں آئیں گے۔

اس کےعلاوہ لیونڈر بھی ایسا خوشبودار پودا ہے جو مچھروں کو دور رکھنے کی صلاحیت رکھتا ہے، اسے گھر کے مختلف حصوں میں رکھا جائے تو ایک تو ایئر فریشنر کا کام کرے گا، اور اس کی اہم خاصیت یہ ہے کہ مچھروں کو وہاں سے جانے پر بھی مجبور کردے گا۔

اینٹی موسکیٹو لوشن

بازار میں کئی طرح کے اینٹی موسکیٹو لوشن دستیاب ہیں، ان کا استعمال آپ کو مچھروں سے بچائے گا اور ڈینگی یا ملیریا کا خطرہ باقی نہیں رہے گا۔

ہینڈ یا سٹن ریکٹس

مچھروں سے بچنے کے لئے یا انہیں مارنے کے لئے کوائل کا استعمال تو ہر گھر میں عام طور پر کیا ہی جاتا ہے لیکن آج کل بازار میں ہینڈ یا سٹن ریکٹس بھی دستیاب ہیں جن کے تاروں میں معمولی سا کرنٹ ہوتا ہے جس سے ٹکراتے ہی مچھر مر جاتے ہیں، ان کا استعمال بھی آپ کو مچھروں سے نجات دلا سکتا ہے۔