راولپنڈی میں بڑھتے ہوئے کورونا کیسز کے پیش نظر محکمہ صحت نے شہر میں اسمارٹ لاک ڈاؤن کی سفارش کردی ہے۔

تفصیلات کے مطابق محکمہ صحت نے 6 جگہوں پر اسمارٹ لاک ڈاؤن کی سفارش کی ہیں جن میں شمس آباد گلی نمبر 6، گلی نمبر 3 ، 7 ریس کورس روڈ اور گلی نمبر 4 اسکیم تھری شامل ہیں۔

اسکے علاوہ گلی نمبر 7 اور 8 محمدی سٹی مسلم ٹاؤن،واہ ماڈل ٹاؤن فیز 2 ٹیکسلا اور  گلی نمبر 18 اسکیم تھری بھی شامل ہیں۔

محکمہ صحت کا کہنا ہے کہ ان علاقوں میں 10 روز کے لیے اسمارٹ لاک ڈاؤن لگایا جائے۔

واضح رہے کہ محکمہ صحت کی ٹیموں نے تجویز شدہ علاقوں میں دورے کے بعد سفارشات تیار کی ہیں۔

دوسری جانب ملک بھر میں عالمی وبا کورونا وائرس سے مزید 25 افراد جاں بحق ہو گئے ہیں۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران مثبت کیسز کی شرح گیارہ اعشاریہ نو ایک فیصد ریکارڈ کی گئی۔

این سی او سی کے مطابق کورونا وائرس سے 25 افراد جاں بحق ہوگئے، جس کے بعد اموات کی تعداد 29 ہزار 162 ہوگئی۔

پاکستان میں کورونا کے تصدیق شدہ کیسز کی تعداد 13 لاکھ 93 ہزار 887 ہوگئی۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 7 ہزار 539 نئے کیسز رپورٹ ہوئے۔

پنجاب میں 4 لاکھ 69 ہزار 540، سندھ میں 5 لاکھ 33 ہزار 496، خیبرپختونخوا میں ایک لاکھ 87 ہزار 983، بلوچستان میں 34 ہزار 131، گلگت بلتستان میں 10 ہزار 557، اسلام آباد میں ایک لاکھ 22 ہزار 98 جبکہ آزاد کشمیر میں 36 ہزار 82 کیسز رپورٹ ہوئے۔