ایم این اے آفتاب حسین صدیقی نے کہا ہے کہ دہشتگردی کے خلاف اس جنگ میں قانون نافذ کرنے والے اداروں کے ساتھ شانہ بشانہ کھڑے ہیں۔

آفتاب حسین صدیقی نے لاہور انار کلی میں بم دھماکے کی شدید الفاظ میں مذمت کی ہے، ان کا کہنا تھا کہ ملک دشمن عناصر کی جانب سے امن و امان کی فضاء کو سبوتاژ کرنے کی مذموم کارروائی ہے۔

ان کا کہنا تھا کہ سنگین واقعے میں قیمتی جانوں کے ضیاع پر گہرے دکھ اور افسوس کا اظہار کرتا ہوں، میری ہمدردیاں متاثرہ خاندانوں کے ساتھ ہیں، زخمیوں کی جلد صحت یابی کیلئے دعا گو ہوں۔

انہوں نے کہا کہ دہشتگردی کے خلاف اس جنگ میں قانون نافذ کرنے والے اداروں کے ساتھ شانہ بشانہ کھڑے ہیں، دھماکے کے ذمہ داروں کو جلد گرفتار کر کے قانون کے کٹہرے میں لایا جائے۔

ایم این اے آفتاب حسین صدیقی کا مزید کہنا تھا کہ اللہ پاک عرضِ پاکستان کی حفاظت فرمائے۔

واضح رہے کہ لاہور کے علاقے نیو انار کلی پان منڈی میں دھماکا ہوا ہے جس میں 3 افراد جاں بحق جبکہ 20 زخمی ہوگئے ہیں۔

لاہور کے علاقے نیو انار کلی بازار کی پان منڈی میں عین اس وقت دھماکا ہوا جب لوگوں کی بڑی تعداد وہاں موجود تھی۔

دھماکا اس قدر شدید تھا کہ اس سے 6 موٹر سائیکلیں اور اردگرد کی دکانیں تباہ جبکہ گاڑیوں میں بھی آگ گئی۔

دھماکے کے زخمیوں کو فوری طور پر قریبی اسپتال منتقل کردیا گیا۔

طبی عملے نے 3 افراد کے جاں بحق ہونے کی تصدیق کردی ہے جب کہ 20  زخمیوں کو طبی امداد فراہم کی جارہی ہے۔

سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے جب کہ پولیس کی خصوصی ٹیمیں شواہد اکٹھا کررہی ہیں۔

ڈی آئی جی آپریشنز کا کہنا ہے کہ ابتدائی شواہد سے ایسا لگتا ہے کہ دھماکے میں موٹرسائیکل استعمال کی گئی ہے۔