وفاقی وزیرداخلہ شیخ رشید احمد نے کہا ہے کہ ہم عمران خان کے ساتھ کھڑے ہیں۔

شیخ رشید احمد نے اپنی سوانح عمری کی تقریب رونمائی سے خطاب کرتے ہوئے کہا کہ میں نے کتاب ان لوگوں کے لیے لکھی جن کے خاندان کا نام نہ ہو، جو کسی قسم کے سیاست وراثت میں لیکر نہ پیدا ہوئے ہوں۔

انہوں نے کہا کہ دنیا میں کوئی ایسی مثال نہیں کہ اللہ نے مجھے 15 ویں وزارت دی۔ میں اسٹوڈنٹس میں سے تھا جب مجھے چین کمیونسٹ پارٹی کی جانب سے دعوت دی گئی، میں اپنی جوان زندگی کے 7 سال جیل میں گزار چکا ہوں۔

وفاقی وزیرداخلہ کا کہنا تھا کہ جب میں نے سیاست کا آغاز کیا میں کچھ بھی نہیں تھا، آج اس ملک کے جو حالات ہیں اور آج 5 جنوری کشمیریوں کا دن ہے اس لیے آج کا دن کتاب کے لیے انتخاب کیا۔ میں ان لوگوں میں سے ہوں جو کشمیر کی جدوجہد آزادی کو پاکستان کے نقشے کے لیے لازمی سمجھتا ہوں۔

شیخ رشید احمد نے کہا کہ ہر پارٹی یہ چاہتی ہے کہ اس پر کسی کا ہاتھ ہو، یہ الگ بات ہے کہ بعض اوقات ہاتھ ہی یہ فیصلہ کر دیتے ہیں کہ جو منتخب ہو کر آئے گا ہم اس کے ساتھ ہونگے۔

انہوں نے کہا کہ معیشت شدید بحران میں ہے جس کو نکالنے کے لیے عمران خان کوشش کر رہا ہے اور ہم عمران خان کے ساتھ کھڑے ہیں۔

وفاقی وزیرداخلہ کا کہنا تھا کہ پاکستان میں سیاست اس میڈیا کی وجہ سے زندہ ہے، میں پورے پاکستان کے میڈیا کا ہمیشہ شکرگزار ہوں۔

شیخ رشید احمد نے کہا کہ یہ ملک انتخاب کی جانب جا رہا ہے۔ ساڑھے تین سال ہم حکومت کر چکے ہیں، چار سال کے بعد تو الیکشن کا سال ہوتا ہے۔

انہوں نے کہا کہ میں کووڈ کو پھیلتا ہوں دیکھ رہا ہوں، اپوزیشن کو کہتا ہوں کہ عقل سے کام لیں جبکہ15 جنوری سے 15 مارچ تک اللہ کرے کورونا کی لہر نہ آئے ۔

شیخ رشید احمد نے کہا کہ یقین ہے کہ اس ملک میں جمہوری نظام بہتری کی جانب جائے گا، اپوزیشن نے کوئی غلطی کی تو جمہوری نظام میں خرابی پیدا ہوسکتی ہے۔

وفاقی وزیرداخلہ شیخ رشید احمد کا مزید کہنا تھا کہ ہماری لوٹی ہوئی دولت کو باہر لیجاکر انوسٹ کیا گیا، اگر زندہ رہا تو چوتھی کتاب لکھوں گا، میری خواہش ہوگی میری چوتھی کتاب میرے مرنے کے 5 سال بعد شائع کی جائے کیونکہ چوتھی کتاب میں ایک سچ لکھ کر جانا چاہتا ہوں۔

تقریب سے خطاب کرتے ہوئے اسد عمر نے کہا کہ شیخ رشید کی کتاب دلکش اور دلچسپ ہوگی ، ہماری سیاست میں ارب پتی لوگ آتے ہیں ، ایسے معاشرے میں مڈل کلاس آدمی کا آنا عام بات نہیں ، شیخ رشید اپنے حلقے کی بہتری کے لیے ہر وقت کوشش کرتے رہتے ہیں۔

انہوں نے کہا کہ وزیر داخلہ بننے کے بعد شیخ رشید کی اپنے کام پر گرفت ہے ، شیخ رشید گہری نظر سے کام کرتےہیں ، خوش قسمتی ہے کہ شیخ رشید کے ساتھ کام کرنے کا موقع ملا ، مشکل حالات میں شیخ رشید نے مجھے سپورٹ کیا۔

وفاقی وزیر اسد عمر نے کہا کہ شیخ رشید کا عوام کی نبض پر ہاتھ ہوتا ہے جس سے ہمیں کابینہ میں فیصلے کرنے میں مدد ملتی ہے۔