پرویزالٰہی نے کہا ہے کہ پاکستان سمیت پورے پنجاب میں صاف پانی کی فراہمی سب سے بڑا مسئلہ ہے۔

اسپیکر پنجاب اسمبلی چودہدی پرویزالٰہی سے اقوام متحدہ کے پاکستان میں ریزیڈنٹ اینڈ ہیومینٹیرین کوآرڈی نیٹر مسٹر جولین ہارنیس کی وفد کے ہمراہ ملاقات ہوئی جس میں اقوام متحدہ ریزیڈنٹ کوآرڈی نیٹر آفس کے ہیڈ شاہ ناصر خان، ایڈیشنل سیکرٹری وزارت ماحولیاتی تبدیلی جودت ایاز ، چیئرمین پینل میاں شفیع محمد، فہیم خان ایم پی اے، سیکرٹری پنجاب اسمبلی محمد خان بھٹی اور عنایت اللہ لک نے شرکت کی۔

اس موقع پر چودہدی پرویزالٰہی نے کہا کہ پاکستان ماحولیاتی تبدیلی کے اثرات سے گزر رہا ہے، پاکستان سمیت پورے پنجاب میں صاف پانی کی فراہمی سب سے بڑا مسئلہ ہے۔

اسپیکر پنجاب اسمبلی کا کہنا تھا کہ ترجیحی بنیادوں پر صاف پانی کی فراہمی کیلئے فلٹریشن پلانٹ لگانے کی ضرورت ہے جبکہ صنعتوں کے ضائع شدہ پانی کو قابل استعمال بنانے کیلئے واٹر ٹریٹمنٹ پلانٹ لگائے جانے چاہئیں۔

انہوں نے کہا کہ زرعی زمینوں پر ہاؤسنگ سکیمیں بنانا بھی ماحولیاتی آلودگی کا باعث ہے، حالیہ چند برسوں میں سموگ کی وجہ سے لاہور دنیا کے آلودہ ترین شہروں میں شمار کیا جانے لگا ہے۔

اسپیکر پنجاب اسمبلی چودہدی پرویزالٰہی کا مزید کہنا تھا کہ ہماری کوشش ہے کہ سموگ پر قابو پا کر ماحول کو مزید آلودہ ہونے سے بچایا جا سکے، بطور وزیراعلیٰ کوشش تھی کہ سندر اور فیصل آباد انڈسٹریل اسٹیٹس میں تمام فیکٹریاں واٹر ٹریٹمنٹ پلانٹ ضرور لگائیں لیکن افسوس بعد میں آنے والی ن لیگ کے دور میں دس سال تک اس پر عمل نہیں کیا گیا۔

اس موقع پر جولین ہارنیس  نے کہا کہ اقوام متحدہ کی کنٹری ٹیم وفاق کے ساتھ قریبی ہم آہنگی رکھے ہوئے ہے، صوبائی حکومتیں اقوام متحدہ کے پائیدار مشن کی تشکیل شروع کر رہی ہیں۔

انہوں نے کہا کہ ترقیاتی تعاون کا فریم ورک 2023-2027  یو این ایس ڈی سی ایف کے حوالے مشاورت کر رہے ہیں، ترقیاتی تعاون کے اس فریم ورک کے ایجنڈے کو 2030 کے منصوبے کیلئے پاکستان کی ترجیحات کے ساتھ ہم آہنگ کیا جائے گا۔

جولین ہارنیس کا مزید کہنا تھا کہ یو این ایس ڈی سی ایف کے موسمیاتی تبدیلی اور ماحولیات کے نتائج کے حصے کے طور پر ہم سندھ کی ماحولیاتی تبدیلی کیلئے قابل عمل ایکشن پلان تیار کرنے کی منصوبہ بندی کر رہے ہیں۔