وفاقی وزیر برائے بحری امور سید علی حیدر زیدی نے کہا ہے کہ انار کلی افسوسناک واقعے میں قیمتی جانوں کے نقصان پر دلی افسوس ہے۔

علی زیدی نے لاہور انار کلی بازار میں دھماکے پر افسوس کا اظہار کرتے ہوئے کہا کہ افسوسناک واقعے میں قیمتی جانوں کے نقصان پر دلی افسوس ہے، دشمن ایک بار پھر پاکستان کے امن کو سبوتاژ کرنے کی کوشش میں ہیں۔

ان کا کہنا تھا کہ ملک دشمن عناصر کو پاکستان کی تیزی سے ترقی ہضم نہیں ہو رہی، دشمن کبھی بھی اپنے ناپاک ارادوں میں کامیاب نہیں ہو سکتا، ملک دشمن عناصر کی بزدلانہ کارروائی پاکستانیوں کے حوصلے پست نہیں کرسکتی۔

انہوں نے کہا کہ پاکستان نے دہشت گردی کے خاتمے کے لیے بے حد قربانیاں دی ہیں، سیکیورٹی ادارے جلد ذمہ داران کا تعین کر کے انہیں نشان عبرت بنائیں گے۔

وفاقی وزیر برائے بحری امور سید علی حیدر زیدی کا مزید کہنا تھا کہ واقعے میں زخمی افراد کی جلد صحتیابی کے لیے دعا گو ہیں۔

واضح رہے کہ لاہور کے علاقے نیو انار کلی پان منڈی میں دھماکا ہوا ہے جس میں 3 افراد جاں بحق جبکہ 20 زخمی ہوگئے ہیں۔

لاہور کے علاقے نیو انار کلی بازار کی پان منڈی میں عین اس وقت دھماکا ہوا جب لوگوں کی بڑی تعداد وہاں موجود تھی۔

دھماکا اس قدر شدید تھا کہ اس سے 6 موٹر سائیکلیں اور اردگرد کی دکانیں تباہ جبکہ گاڑیوں میں بھی آگ گئی۔

دھماکے کے زخمیوں کو فوری طور پر قریبی اسپتال منتقل کردیا گیا۔

طبی عملے نے 3 افراد کے جاں بحق ہونے کی تصدیق کردی ہے جب کہ 20  زخمیوں کو طبی امداد فراہم کی جارہی ہے۔

سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے جب کہ پولیس کی خصوصی ٹیمیں شواہد اکٹھا کررہی ہیں۔

ڈی آئی جی آپریشنز کا کہنا ہے کہ ابتدائی شواہد سے ایسا لگتا ہے کہ دھماکے میں موٹرسائیکل استعمال کی گئی ہے۔