پاکستان کے وزیر اعظم عمران خان نے پی ایس ایل سیزن 7 کے لئے نیک خواہشات کا پیغام دیا ہے۔

کامیاب جوان پروگرام کے سربراہ عثمان ڈار و دیگر نے وزیر اعظم عمران خان سے ملاقات کی اس موقع پر شاہین آفریدی اور عاقب جاوید بھی موجود تھے۔

عمران خان نے اس موقع پر کہا کہ میری نیک تمنائیں پی ایس ایل سیزن 7 کے ساتھ ہیں ، انہوں نے کہا کہ پی ایس ایل اب ایک برانڈ بن چکا ہے۔

کامیاب جوان پروگرام کے سربراہ عثمان ڈار نے اسپورٹس ٹیلنٹ ہنٹ پروگرام پر وزیر اعظم عمران خان کو بریفنگ دی، اور اس پروگرام کے تحت سامنے آنے والے نئے فاسٹ بالر محمد زاہد کے بارے میں بتایا، محمد زاہد بھی ملاقات میں موجود تھے۔

نئے فاسٹ بالر محمد زاہد کو کامیاب جوان اسپورٹس ڈرائیو کے سیالکوٹ میں جاری پروگرام میں منتخب کیا گیا۔

وزیراعظم عمران خان نے عثمان ڈار کو کامیاب جوان اسپورٹس ڈرائیو کے تحت نئے ٹیلنٹ کی تلاش پر مبارکباد دی اور کہا کہ پی ایس ایل نئے ٹیلنٹ کی تلاش میں اہم کردار ادا کر رہا ہے۔

وزیر اعظم عمران خان نے کہا کہ پی ایس ایل پاکستان کا ایک بڑا برانڈ بن چکا ہے اور امید ہے کہ پی ایس ایل سیزن 7 میں بہترین میچز دیکھنے کو ملیں گے۔

وزیر اعظم عمران خان نے اس موقع پر شاہین شاہ آفریدی کی ورلڈ کپ میں شاندار کارکردگی پر مبارکباد پیش کی اور مستقبل کے لئے نیک خواہشات کا پیغام دیا۔

کامیاب جوان پروگرام کے سربراہ عثمان ڈار کا کہنا تھا کہ پی ایس ایل کے میچز کے دوران کامیاب جوان کے نئے ٹیلنٹ کو خصوصی دعوت دی جائے گی۔