کورونا اب انسانوں سے جانوروں میں بھی منتقل ہونے لگا، انسانوں سے ہرنوں میں کووِڈ 19 کی منتقلی کی تصدیق۔

تفصیلات کے مطابق دنیا بھر کے انسانوں میں کورونا وبا کے تیزی سے پھیلاؤ کے بعد سائنسدانوں نے خبردار کیا ہے کہ کورونا وائرس انسانوں سے جانوروں میں بھی منتقل ہونے لگا ہے۔

امریکہ میں کی گئی تحقیق کے مطابق اب تک کم از کم 6 کیسز میں انسانوں سے ہرنوں میں کووِڈ 19 کی منتقلی کی تصدیق ہوئی ہے۔

جس کے بعد سائنس دانوں کا کہنا ہے کہ ہرنوں میں کرونا وائرس کا پھیلنا انسانوں کے لیے پریشانی کا سبب بن سکتا ہے۔

رپورٹ کے مطابق اوہائیو اسٹیٹ یونیورسٹی کے محققین نے اوہائیو کے 9 مختلف علاقوں میں 360 جنگلی سفید دم والے ہرنوں کی ناک سے نمونے لیے تھے۔

ان نمونوں کی جانچ کے بعد یہ بات سامنے آئی ہے کہ اوہائیو 6 مقامات پر 35 فیصد سے زیادہ ہرنوں میں وائرس کی کم از کم تین مختلف قسموں کا جینیاتی مواد پایا گیا ہے۔

تاہم ہرنوں سے انسانوں میں وائرس کی منتقلی کا اب تک کوئی کیس سامنے نہیں آیا لیکن سائنسدانوں نے خبردار کیا ہے کہ اگر جانور کورونا وائرس کی منتقلی کا زریعہ بن جاتے ہیں تو یہ انسانوں کے لئے خطرناک ثابت ہو سکتا ہے۔

واضح رہے کہ اس سے قبل اوہائیو اور پینسلوانیا یونیورسٹیز کی تحقیقات سے یہ بات ثابت ہو چکی تھی کہ کورونا وائرس انسانوں سے جانوروں میں بھی منتقل ہو سکتا ہے۔