چیئرمین نیب نےکہا ہے کہ نیب زیرو کرپشن اور سو فیصد ترقی پر بھرپور یقین رکھتا ہے۔

چیئرمین نیب جسٹس (ر) جاوید اقبال کی زیر صدارت نیب ہیڈ کوارٹرز اسلام آباد میں اعلیٰ سطحی اجلاس منعقد ہوا جس میں چیئرمین نیب نے نیب کراچی کی شاندار کارکردگی کو سراہا۔

اجلاس کی صدارت کرتے ہوئے چیئرمین نیب نے کہا کہ نیب زیرو کرپشن اور سو فیصد ترقی پر بھرپور یقین رکھتا ہے، گیلانی اینڈ گیلپ سروے کے مطابق 59 فیصد لوگ نیب پر اعتماد کرتے ہیں۔

انہوں نے کہا کہ نیب کے ملک کی مختلف احتساب عدالتوں میں بدعنوانی کے 1237 ریفرنسز زیر سماعت ہیں، جن کی مالیت 1353 ارب روپے بنتی ہے۔

جاوید اقبال نے یہ بھی کہا کہ نیب کی موجودہ انتظامیہ کے دور میں نیب نے بالواسطہ اور بلاواسطہ طور پر 539 ارب روپے ریکور کئے ہیں۔

ان کا کہنا تھا کہ غیر قانونی ہائوسنگ سوسائٹیوں نے متاثرین کو نہ ہی ان کے پلاٹ دیئے اور نہ ہی ان سے لوٹی گئی رقم انہیں واپس کی، نیب نے غیر قانونی ہائوسنگ سوسائٹیوں سے اربوں روپے وصول کرکے ان کے متاثرین کے حوالے کئے ہیں۔

چیئرمین نیب جسٹس (ر) جاوید اقبال کا مزید کہنا تھا کہ لاہور، ملتان، سکھر، کوئٹہ، کراچی، پشاور، راولپنڈی، اسلام آباد اور ملک کے دیگر حصوں میں کارروائی کی گئی ہے۔