وزیراعظم پاکستان کی ہدایات پر پنجاب فوڈ اتھارٹی نے جعلی دودھ مافیا کے گرد گھیرا تنگ کرتے ہوئے دودھ کے نام پر کیمیکلز کا سفید زہر سپلائی کرنے والوں کے خلاف آپریشن کیا ہے۔

پنجاب فوڈ اتھارٹی نے علی الصبح چونیاں روڈ پتوکی پر کیمیکلز سے دودھ بنانے والے یونٹ پر چھاپہ مارا ہے۔

ڈائریکٹر جنرل (ڈی جی) فوڈ اتھارٹی رفاقت علی نسوآنہ کا کہنا ہے کہ وے پاوڈر، ٹی وائٹنرز اور کیمیکلز کی مدد سے دودھ کی بھاری مقدار تیار کی جارہی تھی۔

انکا کہنا ہے کہ مضرصحت محلول کو چھپا کر رائے ونڈ لاہور اور کوٹ رادھا کشن میں سپلائی کیا جارہا تھا، 780 لیٹر ٹی وائٹنر، پلاسٹک ڈرمز  اور بھاری مقدار میں تیار شدہ محلول موقع پر تلف کردیا گیا ہے۔

رفاقت علی نسوآنہ نے کہا کہ صحت دشمن عناصر زیادہ منافع کی لالچ میں ممنوعہ اجزاء کو دودھ نما محلول بنا کر فروخت کرتے ہیں، فوڈ سیفٹی ٹیم نے رکشہ ٹرالی سے محلول سپلائی کرنے کا سراغ لگا کر کارروائی کی۔

ڈی جی فوڈ اتھارٹی کا کہنا ہے کہ انسانیت دشمن عناصر سخت ترین سزاوں کے حقدار ہیں، عوام تک ملاوٹ سے پاک دودھ کی فراہمی کیلئے ڈیری سیفٹی ٹیمیں 24 گھنٹے مصروف عمل ہیں۔

انہوں نے مزید ہے کہا کہ وزیراعظم پاکستان کے ویژن کے مطابق عوام تک معیاری خوراک کی فراہمی کے لیے 2022کے آغاز سے ہی ملاوٹ مافیا کے خلاف کارروائیاں مزید سخت کردی گئی ہیں۔